شوقي غريب يكشف موقف مشاركة صلاح في طوكيو 2021 وخلافه مع رمضان صبحي
شوقي غريب يكشف موقف مشاركة صلاح في طوكيو 2021 وخلافه مع رمضان صبحي
قال الكابتن شوقي غريب، المدير الفني للمنتخب الأوليمبي، إن المُعسكر المنتخب استعدادًا لبطولة طوكيو 2021 سيبدأ من الغد، حيث إن أول تجمع سيكون الساعة 12:30 ظهرًا، وسيتم خوض أو تمرين، «المُعسكر هيكون مفتوح وليس مغلقا، كان فيه خطة أننا نقابل بشكل ودي جنوب أفريقيا والأرجنتين واستراليا، بس لقينا مشكلة بسبب كورونا أن فيه دول بتقفل المطارات وتمنع الدخول والخروج».
وأضاف «غريب»، خلال مداخلة هاتفية في برنامج «الحكاية»، مع الإعلامي عمرو أديب، على شاشة «MBC مصر»، أنه فضل بعد ذلك أن يكون المعسكر داخليا، وعبارة عن التدريب على طرق وأسلوب اللعب، موضحًا أن الدوري المصري أفرز لاعبين جيدين للغاية، «قولنا ندرب الشباب دي ونديها الفرصة لحد يوم 30 يونيو لما نيجي نختار القائمة الرئيسية ونشوف مين اللي سليم ومين مصاب وكده».
وأشار المدير الفني للمنتخب الأولمبي، إلى أن اللائحة تقر أن هناك 18 لاعبا في البطولة، فضلا عن 4 بصفة احتياطية، «نقدر نغير منهم في الإصابات بس، من ضمن الـ 18 لاعبا الأساسيين هم 3 لاعيبة فوق السن، من بينهم طبعا اللاعب محمد صلاح، لاعب نادي ليفربول الإنجليزي، بس أمره لم يُحسم بعد، إحنا لسه مخاطبناش ليفربول مستنيين هنعرف نقابل مين عشان نقولهم في الملف».
وتابع: «لازم يكون عندنا بلان كامل نبعته لليفربول، نقولهم الفنادق والملاعب ومواعيد المباريات، كل الحاجات دي موجودة ومحددة لينا من قبل الاتحاد الدولي، لكن يتبقى القرعة لازم نقول لليفربول أحنا هنقابل مين، أحنا قائمين على هذا العمل بطريقة احترافية، رغبتنا الأكيدة أن يبقى معانا صلاح، كما أنه يجب أن تكون هناك موافقة من ليفربول على مشاركة صلاح، بجانب موافقة شخصية من اللاعب».
وتحدث «غريب» عن ما تردد حول الخلافات ما بين رمضان صبحي ومحمد صلاح على قيادة المنتخب، قائلا: «اللاعيبن معندهاش الكلام ده خالص، لا خناقات ولا زعل، أحنا بنتعامل مع اللاعيبن بفكرهم، أحنا بنغير الهارد بتاع المخ بتاعنا عشان نعرف نتعامل معاهم، يعني نتعامل مع ناس في عمر 19 لـ 22 سنة يبقى أحنا اللي ننزل لمستوى تفكيرهم مش هما اللي يطلعوا لينا».
