قبل وفاته بـ24 ساعة.. رشوان توفيق يكشف آخر مكالمة له مع عزت العلايلي
قبل وفاته بـ24 ساعة.. رشوان توفيق يكشف آخر مكالمة له مع عزت العلايلي
كشف الفنان رشوان توفيق، تفاصيل آخر مكالمة بينه وبين الفنان عزت العلايلي، قبل رحيله بـ24 ساعة، وذكر أن عزت العلايلي وأحمد توفيق وعبدالرحمن أبو زهرة دفعة واحدة، «دخلنا معهد الفنون المسرحية مع بعض، ودخلنا التليفزيون في يوم واحد يوم افتتاحه»، وذلك خلال حوار تليفزيوني على شاشة «صدى البلد».
وأضاف «توفيق»، أنه فضلًا عن كونهم دفعة واحدة، إلا أنه تجمعهم صداقة دائمة بينهم، «إحنا كنا كل يوم الصبح والظهر والليل مع بعض، اتعمل مسرح التليفزيون كنا فرقة واحدة، ونسافر سفريات مع بعض، وكانوا عاملين برنامج إذاعي ليا، دخل عزت العلايلي مداخلة قالهم رشوان توفيق ده أخويا يمشي ملاك على الأرض».
وأوضح رشوان أنه كان يلتقي بالفنان عزت العلايلي التقاء روحي، «قبل ما ينتقل لرحمة الله بـ24 ساعة، كلمني في التليفون وكنا عاملين نهزر، ونفتكر مواقف عادل بدر الدين اللي كان ليه مواقف كوميدية، خاصة في فيلم النبوت، وكان عزت العلايلي هو اللي مرشحه، وكل ما يعمل حاجة غلط، يندهوا على عزت يقولوا له شوف مجايبك».
وتابع: «تاني يوم الصبح الساعة 11 ونص، لاقيت تليفون من الصحافة وحد بيقولي أنا بعزيك في الفنان عزت العلايلي، قولتله أنت بتقول إيه وقفلت معاه، أتصلت على تليفون عزت مردش، أتصلت على تليفون البيت محدش رد، كلمت على طول سميرة محسن، قولتلها اتصلي بأشرف زكي أنتي معاه على طول، قالتلي الخبر للأسف صح».
وأردف رشوان توفيق أن الفنان خالد النبوي منعه من الذهاب للجنازة، خوفًا عليه من وباء كورونا، « خالد النبوي ده ابني، وممثل عظيم جدا ويحبني في الله، لأنه طلع معايا وهو صغير، يبوظ البرستيج بتاعي ويخرجني من المود، عملي عيد ميلاد أنا وهو بس».
