صاحب «كانتين» للأطعمة بالمنطقة: «الرزق يحب الخفية»

فى منطقة فسيحة بمدخل المنطقة الرئيسية لحفر قناة السويس الجديدة توجد عشة صغيرة يزينها علم مصر، يتوافد عليها الكثير من العمال على مدار اليوم لشراء الساندويتشات والشاى والقهوة، رغم بساطتها يقصدها السائقون لأنه لا يوجد غيرها فى المنطقة بأكملها. صاحب الكانتين سلامة عيد عودة، من مواليد الإسماعيلية عام 1977، ومقيم بجوار وادى التكنولوجيا بالضفة الشرقية من القناة، ويحاول تلبية طلبات جميع العمال المتوافدين عليه، العمل بالكانتين لا يتوقف طوال الـ24 ساعة «طول ما العربيات دايرة إحنا شغالين»، هكذا يقول «سلامة عيد» الذى يضيف قائلاً «أنا موجود فى المنطقة منذ عامين، بعد أن أنشأنا فيها بعض العشش، لكن فكرت فى فتح كانتين مع بداية مشروع حفر القناة الجديدة، وطول ما المشروع شغال إحنا موجودين ومالناش زبون تانى غير اللى شغالين فى المشروع، فيه ناس تانية قلدتنا فى أماكن تانية من مناطق حفر المشروع، لكن إحنا اللى ضربنا ضربة البداية قبل حفلة الافتتاح وحضور الرئيس عبدالفتاح السيسى». يقطع سلامة حديثه ليجيب أحد الزبائن، ثم يكمل قائلاً «مبيعاتنا فى متناول الجميع، كوب الشاى بجنيه واحد، وساندويتش الطعمية أو الفول بجنيه برضه، فيه ناس بتقول لى أنت أسعارك رخيصة قوى، بقولهم ده راجل جاى عرقان وشقيان، أرفع السعر إزاى ودول ناس أرزقية على باب الله، ماينفعش أستغل ظروفهم عشان مفيش حد غيرى هنا، نحضر احتياجاتنا من الفول والطعمية والخبز من قرية التقدم التى تبعد عنا 5 كيلو، المشروع ده حرك المياه الراكدة شرق البحيرات مع امتداد مدينة القنطرة شرق وحتى شرق التفريعة، وسيسهم فى انتعاش المنطقة اقتصادياً، فيه واحد ما أعرفوش جالى النهاردة وسألنى ممكن أفتح كشك لتصليح الكاوتش قلت له تعالى وشجعته، المشروع ده هيفتح بيوت كتيرة، وهيقضى على البطالة على الأقل فى منطقة القناة وسينا».