«حياة كريمة».. سقف لـ«عاطف» وأسرته يحميه من الأمطار: مكنتش أحلم بكده
«حياة كريمة».. سقف لـ«عاطف» وأسرته يحميه من الأمطار: مكنتش أحلم بكده
كلما حل الشتاء ينظر «عاطف» إلى السماء وقد وضع «ايده على قلبه»، هل تفعلها معنا اليوم ونعيش ليلية عصيبة تحت وطأة الأمطار الجارفة، ولكن الحال تبدل 180 درجة «قاعدين في أمان.. والجو يمطر أو لأ.. مايهيمناش»، أصبح لـ«عاطف» سقفا يحميه هو وأبناءه من مياه الأمطار والفضل يعود للمبادرة الرئاسية حياة كريمة، «كنا قاعدين تحت بوص والشتاء لو جه شوية هوا بيطير والمطر بينزل علينا، لحد ما جت جمعية الأورمان ربنا يديهم الصحة».
مبادرة «حياة كريمة» والتي أطلقها الرئيس عبدالفتاح السيسي، لتطوير القرى والنهوض بأوضاع أبنائها، استجابت لعاطف رياض عبدالله من محافظة المنيا، وطورت منزله وأنقذت أسرته من الأمطار.
بنجري في أي مكان وأي أوضة نستخبى فيها من المطر
يحكي عاطف لـ«الوطن» عصارة سنوات من المعاناة كان يتحملها هو أسرته بفعل الأمطار، «ولادي كانوا تعبانين في المطر، وكنا بنجري في أي مكان وأي أوضة نستخبى فيها، وكانوا بيقولو يابابا عاوزين بيت وعاوزين نعدل البيت، بس مكانش في حاجة نعدل بيها البيت، أنا بشتغل بلودر وبزرع، مرة خابت ومرة جابت، على أد مصاريفنا وخلاص».
كنا قاعدين تحت «البوص»
يعاني أبو الأولاد من كثرة المسؤوليات ولا يستطيع أن يبني لنفسه سقفا أو بيتا يوفر عليه وأسرته مشقة كل عام، «أنا راجل فلاح بشتغل بالأجرة ولو ما أشتغلتش يوم مش هلاقي أأكل الولاد، واللي جاي على أد المصاريف، معايا 5 ولاد وكنا قاعدين تحت بوص والشتاء لو جه شوية هوا بيطير والمطر بينزل علينا».
ابتسمت الحياة لعاطف ووجد يد العون من قبل الحكومة والجمعيات الأهلية «كنت على هذا الحال، لحد ماجت جمعية الأورمان ربنا يديهم الصحة، هما وكل اللي ساعد جمعية الأورمان بجنيه واحد، ربنا يرزقهم ويوسع عليهم ويجعل أعمالهم في ميزان حسناتهم».
حاجة مية مية ومكنتش متوقعها خالص
يقول عاطف، «الحمد لله أدينا قاعدين في أمان والجو يمطر أو لأ مش هيهمناش، الجمعية عملتلنا حاجة مكنتش أحلم بيها ولو هقعد أشتغل 50 سنة مكنتش هعمل اللي عملوه جمعية الأورمان، حاجة مية مية ومكنتش متوقعها خالص.. الحمد لله يارب».
وكان وزير القوى العاملة محمد سعفان، قد وجه بالإعداد لجولة ميدانية جديدة لإطلاق مبادرة «حياة كريمة»، بالعاصمة الإدارية الجديدة لحصر وتسجيل العمالة غير المنتظمة لاستخراج شهادات قياس مستوى المهارة وترخيص مزاولة الحرفة واستخراج بطاقات قومية جديدة بالمهنة التي يعملون عليها تمهيدا لعمل منظومة متكاملة لرعايتهم اجتماعيا وصحيا وتأمينيا.
