حمار بـ10000 جنيه.. وصاحبه: "عضم وخشانة وأدب وحسب ونسب"
حمار بـ10000 جنيه.. وصاحبه: "عضم وخشانة وأدب وحسب ونسب"
منذ سنوات وهو يهوى تربية الحيوانات، وبخاصة سلالات الحمير الجيدة نظرا لما يجنيه من أموال نظير بيعه تلك الأصناف التي يعتبرها عالية الجودة، ويمكن للمشتري أن يستفيد منها في شتى المجالات، وذلك لتمتعها بالقوة الجسمانية التي تمكنها من القيام بأعمال الفلاح كـ"الحرث"، إلى جانب جر عربات "الكرو"، تلك المهمة التي تحتاج "حمار" يمتلك مواصفات خاصة، وجهة نظرة تلك جعتله يخصص جزءا من حياته من أجل تربية الحمير، في سبيل التجارة بها.
محمد أمين،37 سنة، أحد أبناء محافظة الدقهلية، وجد في تربية الحمير والاتجار بها ضالته التي نجح من خلالها في تحقيق الربح المادي، وعرض حماره للبيع على أحد صفحات التواصل الاجتماعي بسعر وصل إلى 10 آلاف جنيه، الأمر الذي قابلته سخرية شديدة من رواد السوشيال ميديا: "أنا عارف قيمة الحاجة بتاعتي، ده حمار زي الجرار، وكمان عارف الأسعار رايحة فين، وأنا طالب فيه السعر اللي أنا شايف إنه يليق بيه وكما عشرة آلاف جنيه مش كتير، الأسعار الغالية دي بعت بيها قبل كده".
ويشير إلى أن من يقومون ببيع حمار بهذا السعر قليلون، إلى جانب أن من يشتري بهذا السعر، لابد له أن يكون مدرك قيمة الحمار، وعلى دراية كاملة بمواصفاته: "الحاجات دي مش موجودة كتير، نادرا ما تلاقي حمار عفي وبيفهم، وتقدر تسيطر عليه من غير ما يأذي حد، أنا بربي علطول حمير، والسنة اللي فاتت كان عندي زيه وبعته بـ15 ألف جنيه، واللي أخده كان عارف قيمته، ودفع الفلوس كاملة، فيه ناس بتشتري من عندي علشان تعمل منه سلالة، لأنه حمار ضخم، ومؤدب، وبيسمع الكلام".
وعن تلقيح الحمار يقول "أمين" إنه يفضل أن يكون التلقيح بثمن مرتفع على أن تكون السلالة جيدة على التلقيح بثمن منخفض وتكون السلالة محلية: "ردورد فعل الناس، صدمتني، لأن الناس مش عارفة قيمة الحمار ده تحديدا، لأنهم شايفين إن آخره 2000 جنيه، طيب اللي مش عايز يشتري يسكت بقى، بلاش يتكلم في سعر حاجة هو مش فاهم فيها".
ويتابع: "فيه برضه ناس شافوه واتفرجوا عليه وكانوا مبهورين بشكله، لكن واحد منهم قالي حمارك حلو، شكله وحجمه وسلالته كويسين، لكن لو أنا اشتريته بـ 10 آلاف جنيه الناس هتقول عليا أهبل، لكن ده ميمنعش، إن الحمار كويس، ولو عندي مش هبيعه".
ويناشد "أمين" كل من يريد شراء حماره أن يحسن معاملته له، إلى جانب أن يراعه: "مش هبيعه غير للي يقدره، في ناس نفسها تاخده بالفلوس دي، ومعندهاش مشكلة تدفع المبلغ، لكن خايفين من ردود فعل الجيران لما يعرفوا إنهم اشتروا حمار بـ 10 آلاف جنيه، لكن أنا شايف إن الموضوع عادي جدا يعني، مفهاش حاجة، طالما يستاهل يبقى إيه المانع".
ويضيف: "فيه ناس اتصلت عليا من الصعيد، عايزة تاخده تعمل منه سلسة، ومفروض جايين بكره يشوفوه، زباينه كتير لأن فيه ناس بتقدر الحاجة الحلوة".
يبلغ هذا الحمار من العمر 5 سنوات، وهو بذلك لازال في مرحلة الشباب نظرا لأن عمر الحمار قد يصل في كثير من الأحيان إلى 20 عاما: "عايز اللي بيفهم في الحمير بس هو اللي يتكلم ويقول التمن".
