نصيحة مصطفى حفناوي للشباب عن الصلاة قبل وفاته: لو حاسس إنك مخنوق هتريحك

02:48 م | الثلاثاء 11 أغسطس 2020

نشرت القناة الرسمية لليوتيوبر الراحل مصطفى حفناوي عبر "اليوتيوب" منذ أقل من ساعة، فيديو يقدم خلاله "حفناوي" نصيحة للشباب عن سبب تغيير حياته وسبب شهرته وحب الناس له.

ويظهر اليوتيوبر الراحل في الفيديو يتحدث عن أهمية الصلاة وفضلها وتأثيرها على حياة المسلم، إذ يقول في الفيديو: "حاسس إنك مضايق أو مخنوق أو شايل همّ ومفيش حاجة بتريّحك، حاسس إن دايمًا في حاجة بتضايقك ومش عارف إيه السبب؟، طب لو عاوز تبقى شاب مبسوط في حياته ومرتاح البال وتعرف الحل لـ ده؟ الحل إنّك تصلي".

وتابع "حفناوي": "الدليل إنّ الصلاة هي اللي هتريّحك، هو إنّ الرسول صلى الله عليه وسلم كان دايمًا لما يحس إنه مش مرتاح أو مخنوق كان دايمًا يقول لسيدنا بلال أرحنا بها يا بلال (يقصد الصلاة)".

واستطرد قائلًا: "في مثل بيقول من حبّه ربّه حبب خلقه فيه، فـ أنت لو بدأت تصلي هتلاقي نفسك بتقرب لربنا وبتحب ربنا، فـ ربنا هيعاملك بالمثل عشان ربنا لو حبك هيحبب عباده فيك".

وتابع اليوتيوبر الراحل: "طب حاسس إنك بتعمل حاجة غلط ومش عارف تبعد عنها ومش لاقي حل لده، بردو الحل في الصلاة، لأنّ ربنا بيقول في سورة العنكبوت (إنّ الصلاة تنهى عن الفحشاء والمنكر)، والدليل التاني حديث عن الرسول فيما معناه إنّ واحد بيقيم الليل وأول ما بيخلص بيروح يسرق، فلما الرسول عرف قال خلاص صلاته سوف تنهاه، معنى كدا إنّ الصلاة بتنهى عن أي حاجة وحشة".

وأضاف "حفناوي": "تخيّل أنك هتموت بكرة أو هتموت كمان ساعة، أول حاجة هتعملها هتقوم تصلي، عشان كدا لما تسمع الأذان تخيل إنك هتموت بعده فتقوم تصلي عشان الآخرة، لأنّ الدنيا دي مالهاش أي لزمة والصلاة دي هي اللي هتنفعني وهتخليني إنسان أحسن".

واستكمل: "أنا واحد من الناس اللي مكانتش بتصلي على طول أو كانت بتصلي صلاة وتسيب الباقي، ومن بعد ما بدأت أصلي بقيت مرتاح وإنسان كويس وبتقدم في حياتي ولما بدعي لحاجة ربنا بيقدمهالي".

واختتم "حفناوي" الفيديو قائلًا: "خلينا نصلي، أول ما الأذان يأذن أشد أي حد من صحابي ويلا بينا نروح نصلي، ولو مكسل تصلي في المسجد؛ صلي في البيت وواحدة واحدة هتتعود، كلنا بنعمل حاجات غلط، بس الصلاة دي بداية لكل حاجة صح".

ورحل عن عالمنا اليوتيوبر مصطفى حفناوي، أمس الإثنين، بعد إصابته بنزيف في المخ، منذ أيام، استلزم نقله للمستشفى، بعد دخوله في غيبوبة، وشيعت جنازته، بمقابر عائلة عفيفي في مقابر القبابات بمركز الصف.