قناة "ماما صفاء" لمواجهة الغلاء: بكسب 200 دولار فى الشهر.. مش زى ما الناس بتقول

06:02 م | السبت 20 يونيو 2020

بعد موجة غلاء الأسعار التى تلت تحرير سعر صرف الجنيه أمام العملات الأجنبية عام 2016، شعرت صفاء محمد مصطفى، بضرورة تقديم المساعدة للأسر المصرية، فى شكل نصائح عن كيفية مواجهة الغلاء، بأقل قدر ممكن من المصروفات، وحيل لتنظيم ميزانية البيت دون خسائر من خلال قناة "ماما صفاء" على موقع "يوتيوب".

على مدار 6 سنوات، استمرت قناة "صفاء"، حتى وصل عدد المتابعين إلى 457 ألف، كما حققت ما يسمى "إثبات ملكية"، وهى علامة يمنحها "يوتيوب" لصاحب المحتوى الأصلى، الذى لديه عدد كبير من المتابعين، بعد أن أصبح مشاهدة كل فيديو لديها لا تقل عن 40 ألف مشاهد: "بدأت القناة، بعد ما كان بتوصلنى مشاكل كتيرة من ستات عن خناقات مع أزواجهم بسبب ارتفاع الأسعار، لدرجة أن كان فى أسر مهددة بالطلاق، وبدأت القناة بفيديوهات بعناوين زى إزاى تعملى وجبة بـ20 جنيه، وإزاى تعملى وجبة بـ30 جنيه، ووصل عدد الفيديوهات لـ700 وصفة فى الحتة دى، وبعد كده انطلقت فى الكلام عن التوفير فى المطبخ، سواء فى الطبخ أو شراء مستلزماته".

حظت "صفاء"، 45 عاماً، من الإسكندرية، بتشجيع أسرتها بالكامل على الاستمرار فى القناة وتطويرها، خصوصاً زوجها الذى يظهر معها فى الكثير من الفيديوهات، للحديث عن كيفية إدارة شئون المنزل أو زيارة الأقارب: "زوجى وولادى الخمسة، 4 شباب وبنت، كلهم بيشجعونى، ولادى هما اللى عملوا لى القناة، وبنتى بتساعدنى لو فى حاجة مش عارفاها فى مجال التكنولوجيا، لكن دلوقتى خلاص، أنا بعرف أصور وأرفع على يوتيوب بنفسى، الموضوع سهل مش قصة كبيرة، لكن الفكرة بس أن ولادى بقالهم فترة معترضين على وجودى، لأنهم شايفين أن يوتيوب بقى فى حاجات مش كويسة، ومحتوى ضد قيم المجتمع".

عند الحديث عن الأرباح التى تجنيها "صفاء" من القناة، تتحدث بصراحة ودون تردد: "أنا بكسب 200 دولار فى الشهر، ناس كتير بتستغرب إزاى المبلغ ده بس وأنا عندى عدد كبير من المتابعين، والقناة قديمة جداً، لكن هى دى الحقيقة، لأنى بقدم محتوى محترم، لا فى إساءة لحد ولا استخفاف بالناس، ومتماشي مع عاداتنا وتقاليدنا وآداب مجتمعنا".الإقبال الشديد على إنشاء قنوات على "يوتيوب" من قبل الأمهات والسيدات الكبار له أسباب وجيهة عند "صفاء" بحكم خبرتها: "فى ستات كتير داخلة الموضوع بهدف المكسب، وأنها تلاقى مصدر مالى تساعد بيه جوزها وبيتها، فى الغلاء اللى إحنا عايشينه من غير ما تضطر تنزل وتتبهدل فى المواصلات، واللى زود عدد الستات دول، الكلام اللى بيتنشر عن أن القنوات دى بتحقق دولارات كتيرة"