بريد الوطن.. فاكر؟!
بريد الوطن.. فاكر؟!
فاكِر لما قابلتك
وانت بتبكى فُراق بدموع؟!
وهديت قلبى يمسح دمعك
ما استنيتش لقلبى رجوع!
قطفت الوردة اللى فِ أيامى
وهديتهالك وأنا مخدوع
أتاريك مش بتحب الحب
وقلبى فِ قلبك مش مسموع
أخدت الدمعة اللى فِ عيونك
ومشيت بالقلب الموجوع..
تعالى يا قلبى أنا وانت وأنا مجروح
هنبعِد يمكن البُعد يهدّى الروح
ولكن إنى أسيبك بعدها مفتوح..
خلاص للحب تانى يا قلبى مش مسموح
ف عِز الدمعة جت إيد تانية تمسح لى
وقالت نفسى آجى فِ حضنك ده تسمح لى
وآخد قلبك وأصونه أصل أنا حاسّة
أنا وقلبك معايا يبقى ده أريح لى
محمد خميس الحاوى
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي bareed.elwatan@elwatannews.com
