فوازير رمضان فى محل فوانيس بدمياط: الفائز يختار جائزته

11:23 م | السبت 02 مايو 2020

مسابقة إلكترونية بسيطة تقام أسبوعياً، تتمثل فى الإجابة عن سؤالٍ واحد، فى مجالات متعددة، دينية أو اجتماعية أو علمية، ويحصل الفائز على فانوس رمضان، ينقش عليه اسم الفائز، وهى مسابقة نظمها مجدى سليم، صاحب محل فوانيس بقرية الحورانى، بمحافظة دمياط، بهدف تسلية السكان وإنعاش ذاكرتهم خلال شهر رمضان الكريم.

يضع «مجدى» سؤال المسابقة فى الصباح على موقع «فيس بوك»، ويتم اختيار الفائز عشوائياً من تعليقات المشاركين: «باقرأ فى مجالات كتير عشان يبقى عندى خلفية وباكتب سؤال بنسبة كبيرة الناس اللى بتقرأ ومطلعة بتكون عارفة الإجابة، وهى فرصة أن الناس تستغل الوقت الفاضى قبل الفطار وتنشط الذاكرة وتقرأ وتعرف معلومة جديدة»، ويقوم بتسليم الجائزة للفائز بداخل المحل عقب وجبة الإفطار مباشرةً: «الفانوس حجمه كبير وخامة كويسة مش أى حاجة لازم أقدم هدية تليق بالمحل وبالناس اللى شاركت فى المسابقة والفايز بيختار الفانوس اللى عايزه وأنا بانقش عليه الاسم لو حابب».

وجدت المسابقة إقبالاً كبيراً من السكان، وبادروا بالمشاركة والبحث عن الإجابات الصحيحة بهدف الفوز: «دى أول سنة أعمل مسابقة زى دى، بس عشان الظروف اللى إحنا فيها قلت أهو جيرانى يتسلوا بدل الملل اللى هما فيه، وكمان أبقى فرّحتهم خصوصاً لأن فى ناس السنة دى ماقدرتش تشترى فوانيس فاستغلوا المسابقة، ودى حاجة أسعدتنى»، ولا يشترط «مجدى» تحديد أعمار للمشاركين، فالأسئلة التى يقدمها بالمسابقة، قد تكون عامة وبسيطة إلى حد كبير: «اللى جاوب صح استفاد بالفانوس واللى ماجاوبش كسب معلومة جديدة، وبكده السكان هيتنافسوا مين هيقدر يجمع معلومات أكتر عشان المسابقات اللى بعدها».