هندسية القوات المسلحة للرئيس: اشتباكات المرافق في المطرية والأميرية كتير
هندسية القوات المسلحة للرئيس: اشتباكات المرافق في المطرية والأميرية كتير
أشاد اللواء إيهاب الفار رئيس الهيئة الهندسية للقوات المسلحة، بمشروعات شرق القاهرة، خلال افتتاح الرئيس عبدالفتاح السيسي، نفق الشهيد أحمد حمدي 2، قائلا: "عملنا 319 كوبري في آخر 5 سنين، لكن لو اتكلمنا على شرق القاهرة، عملنا 38 كوبري في خلال آخر 5 شهور، ولما عرضنا على سيادتك الموضوع من 5 شهور، من خلال تصور كامل لمنطقة شرق القاهرة".
وأضاف الفار: "كانت الفكرة الرئيسية إننا نفك الاشتباكات المرورية داخل المنطقة، ودي صعبة جدًا، وسكان مصر الجديدة بيحسوا بالفرق، أنا من سكان المنطقة، وكنت باخد في المنطقة على الأقل نص ساعة عشان أتجاوزها، ودلوقتي بتحرك جوه مصر الجديدة في 5 دقائق".
وتابع: "نفذنا المرحلة الأولى وكان فيها 6 كباري، وسيادتك أمرت بالمرحلة الثانية اللي فيها 8 كباري، وهي أصعب مرحلة نفذناها، الموضوع صعب جدًا، بالنسبة لموضوع مناطق المطرية والحلمية والأميرية ففيها حجم اشتباكات مرافق غير طبيعي، عندنا نفق رئيسي للصرف الصحي، وبننسق مع وزارة الإسكان، والنفق 1800 مللي، فيه خطوط مياه وصرف ومرافق غير معلومة، وعشان أنفذ كوبري في التوقيت ده، فأنا بعتبر إن ده فضل من ربنا".
وواصل: "بدأنا من شهر ونص في الحلمية والمطرية، خلصنا 2 كوبري، وقدامنا أسبوع نخلص الكوبري الثالث، هيبقى متبقي 5 كباري من أصل 8، هننتهي منهم في الأسبوع الأول بعد العيد بنسبة 100%".
