مصور يوثِّق "فترة الحظر" في جلسة تصوير كوميدية: خليك في البيت وساعد مراتك

07:30 م | الثلاثاء 31 مارس 2020

أمام ساعات الحظر الطويلة، وجد محمد الغرباوى، مصور مصرى مقيم فى السعودية، نفسه جالساً فى المنزل بلا أى مسئوليات أو مهام عمل، فاستغل وقت فراغه فى المذاكرة للأبناء ومساعدة زوجته فى المنزل، ثم قرر توثيق تلك المرحلة من حياته بجلسة تصوير يغلب عليها الطابع الكوميدي تحت عنوان «خليك بالبيت».

«فكرة الصور جت بعد فرض حظر التجول، فكرت إزاى أنصح الناس بشكل كوميدى لطيف، لأنهم في الغالب مش بيحبوا حد ينصحهم بشكل مباشر، وكانت الفكرة هى فوتوسيشن إزاي الراجل ممكن يستغل وقته فى البيت»، بحسب ما قال المصور «الغرباوى»، صاحب الـ 34 عاماً.

اعتمد على زوجته فى تصويره، وكتب تحت كل صورة تعليقاً تحفيزياً، فمثلاً فى إحدى الصور ظهر وهو يلعب مع ابنته «ميرا»، فكتب تعليقاً يدعو فيه الرجال إلى استغلال الحظر فى اللعب مع أبنائهم، واستعادة ذكرياتهم مع الطفولة، وركز «الغرباوى» على ضرورة مساعدة الرجال لزوجاتهم فى المهام المنزلية تحت تعليق (ساعدها فهى تستحق): «عارف أن النقطة دى حساسة جداً خصوصاً عند الرجل الشرقى بصفة عامة مش المصريين بس، لكن أنا اعتمدت فى توصيل النصيحة على الجانب العاطفى والكوميدى، من ناحية أن الزوجة تستاهل أننا نساعدها فى شغل البيت بمسح الأرض أو غسيل المواعين، فعملت المهام دى وكتبت تحت الصور تعليق: اتعلم مهارات جديدة».