وزيرة الهجرة تنشر فيديو 1700 طالب عالقين على الحدود المصرية السودانية
وزيرة الهجرة تنشر فيديو 1700 طالب عالقين على الحدود المصرية السودانية
نشرت السفيرة نبيلة مكرم، وزيرة الهجرة، فيديو لـ1700 طالب عالقين على الحدود المصرية السودانية.
وكتبت نبيلة مكرم عبر حسابها الشخصي على فيس بوك: "1700 طالب عالقين على الحدود المصرية السودانية، بقالنا يومين في شغل صبح وليل على معبر قرسطل، كله بيشتغل بس لازم كمان نتأكد من سلامتهم، وضبطنا مع وزارة الصحة يجيولنا على المعبر يحللوا للأولاد.. ده بياخد وقت.. والأولاد جعانة وعطشانة وزهقانة.. بس حسوا بالفرق، وشافوا المعاملة الطيبة من رجالتنا بتوع حرس الحدود بعد ما الدولة فتحت المعبر وشافت وزارة الهجرة بتكلمهم على تليفوناتهم وترجع تطمن أهاليهم".
وأضافت مكرم: "وشافوا وزارة الصحة اللي جاتلهم.. شافوا مصر معاهم، طب حياكلوا ويشربوا منين لغاية ما تخلص فترة التحليل.. رجل أعمال وطني مش بس استجاب ووافق على طلبي بتوفير أتوبيسات ونقلهم من المعبر لبيوتهم بس كمان زود من عنده الوجبات.. طب نوصلها إزاي للعيال والمعدية اللي بتنقل الأوتوبيسات بتقفل الساعة 5.. جم بقى حرس الحدود.. قالوا مالكوش دعوة حنتصرف.. جابوا مراكب خاصة ولانشات لنقل الوجبات".
واختتمت مكرم منشورها: "رسايل الأمهات اللي بتدعلينا هي أجرة كل واحد فينا اشتغل في اليومين دول.. والنهارده يوم الجمعة كله لسه شغال علشان بتوفيق ربنا كلهم حيرجعوا بيوتهم.. كل واحد فينا عارف شغله وشغل وزميله.. علشان كده النجاح بيبقى للكل.. حمدلله على السلامة".
