ورشة عائلية لصناعة منتجات يدوية من الخوص والشمر والحنة

كان محمود ربيع، يجر العربة الكارو الضخمة المحمّلة بالمنتجات اليدوية، من شارع إلى شارع بلا كلل أو ملل، ورغم سنه الصغيرة التى لا تتجاوز الـ17 عاماً، فهو خبير فى المنتجات اليدوية المصنوعة من الغاب والخوص والشمر والحنة.

«إحنا فى الفيوم مشهورين بصناعة الغاب والخوص والمنتجات اليدوية، لكن بيعها عندنا مش بيجيب همّه، كمان بدأ يخف الإقبال عليها فى المحافظات اللى حوالينا، فقررت آخد العربية الكارو، وعليها المنتجات اللى بنصنعها، وألف بيها شوارع القاهرة، خصوصاً المناطق الراقية زى المهندسين، ومصر الجديدة»، كلمات «محمود»، الذى عمل على ترويج منتجاته وسط المارة.

«محمود» هو العمود الفقرى لأسرته المكونة من ٧ أفراد، يعيشون فى غرفتين صغيرتين فى الفيوم، لحمايتهم من الفقر والعوز: «سبت التعليم، وقلت كفاية عليا دبلوم، علشان أقدر أتحرك وأبيع وأوفر فلوس لعيلتى، لأن عندى اتنين اخوات فى التعليم، واحد أصغر منى فى الإعدادى، والتانى أكبر فى الكلية، إلى جانب اخواتى البنات، أمى تعبانة ولسه خارجة من عملية، ومش بتقدر على الحركة، وأبويا سنه كبير، معدى الـ٧٠ سنة، فأنا العائل الوحيد ليهم».

امتلأت عربة «محمود» بمنتجات يدوية، مثل حقائب، طاولات، مقاعد، سلال، تحف، وهى منتجات تمر بالكثير من المراحل حتى تأتى إلى القاهرة، وأول مرحلة هى تجفيف الخوص والغاب، وأحياناً تُستخدم عيدان الشمر والحنة، ثم تجتمع سيدات العائلة حول المنزل، للمساعدة فى صناعة هذه المنتجات: «الرجالة بيفنّشوا المنتجات فى صورتها النهائية وبعدها باجمعها وباسافر بيها للقاهرة، باركب أكتر من ٧ مواصلات، علشان أنزل القاهرة أبيعها على عربية كارو، ولما تخلص البضاعة أروح».

• منتجات الخوص
• المنتجات اليدوية
• المهندسين
• مصر الجديدة
• منتجات الخوص
• المنتجات اليدوية
• المهندسين
• مصر الجديدة