"شارع السعادة": أراجوز وبالونات لنشر البهجة بين المارة

08:57 م | الاثنين 10 فبراير 2020

كثرة الأعباء اليومية والمسئوليات تصيب البعض أحياناً بحالات نفسية سيئة، ما دفع عدداً من الشباب للتفكير فى تحسين هذه الحالات النفسية، من خلال توزيع جمل تحفيزية مكتوبة بخط اليد، وبالونات مرسوم عليها وجوه مبتسمة، فضلاً عن تقديم عروض أراجوز فى الشارع، تحت اسم «شارع السعادة».

محمد راتب، عائشة رضا، ياسمين عبدالله وهدير عبدالعظيم، يقومون بتنظيم رحلات يومية فى مناطق ومحافظات مختلفة، لتقديم عروض ترفيهية بسيطة، ونشر عدوى السعادة بين المارة: «عندنا تحدى إزاى نقدر نسعد معظم الناس بأقل جهد وتكلفة، لأننا شعب بسيط الكلمة الحلوة والابتسامة بتفرحه، وتساعده يكمل يومه بتفاؤل»، بحسب «عائشة».

أمام دار الأوبرا وفى وسط البلد، قدم الشباب عروضاً مؤخراً، وتم التقاط صور تذكارية مع المارة وهم يضحكون توثيقاً لتلك اللحظات السعيدة: «بخلاف إننا بننزل منطقة مختلفة كل يوم، لنا يوم فى الأسبوع بنزور محافظة، وآخرها كانت أسيوط»، ووفقاً لـ«عائشة»، يتعاون الفريق منذ أكثر من 3 سنوات، ويقومون بتطوير مهاراتهم البسيطة والترفيهية لإسعاد المواطنين بين الحين والآخر: «أول ما بدأنا كنا بننزل نوزع ورق مكتوب فيه جمل زى اضحك محدش واخد منها حاجة، السعادة رزق ما تضيعهوش»، وعندما لمسوا استجابة وسعادة من المواطنين، حرصوا على تقديم الجديد والأفضل. «كلنا بنشتغل، وفيه مننا بيدرس فى الجامعة، بس وقت الفعاليات بناخد إجازة من الشغل يا إما بنظبط المواعيد مع بعض، بحيث نقدر نساعد غيرنا، والفرحة اللى بنشوفها فى عيون الناس تسعدنا إحنا كمان»، بحسب «عائشة».