معرض الكتاب ينعش تجارة شركات الشحن: "الكيلو بـ30 جنيه"

08:00 م | الاثنين 03 فبراير 2020

أنعش معرض القاهرة الدولى للكتاب فى دورته الـ51 تجارة شركات الشحن، حيث تزايد الطلب على شحن كميات كبيرة من الكتب، والتى يقوم زوار المعرض بشرائها، خصوصاً الذين يأتون من المحافظات الأخرى، وتختلف التسعيرة وفقاً لوزن وعدد الكتب، وتتراوح التكلفة بين 15 و100 جنيه.

أحمد رأفت، من مدينة طنطا، يعتمد بشكل أساسى على شركات الشحن، خلال زياراته المستمرة للمعرض، ويصل سعر توصيل الكيلو من الكتب 30 جنيهاً، ويتم تسلمها من باب المعرض وتوصيلها إلى المنزل مباشرة: «بقالى 5 سنين بتعامل مع شركات الشحن من ساعة ما عرفت إن فيه شركات بتوصّل، وده بالنسبة لى أحسن لأنى بشترى كتب كتير جداً وببقى محتاس بيها والشركة تكلفتها بسيطة المهم الكتب توصل كاملة وسليمة»، يتواصل «أحمد» مع شركة الشحن قبل زيارته للمعرض بيوم، ويحدد موعداً لتسلم شحنة الكتب منه: «عقبال ما بوصل بيتنا فى طنطا بتكون الكتب وصلت».

هدير أحمد، مسئولة عن خدمة توصيل الكتب بدار «دوّن»، تستقبل خلال فترة المعرض حجوزات كثيرة لشحن الكتب إلى المحافظات المختلفة، ويختلف سعر التوصيل حسب عدد الكتب، وأقصى قيمة للشحن 50 جنيهاً، وتتعامل الدار مع دور النشر المختلفة: «ناس كتير جداً بتحجز معانا من المحافظات التانية وبنطلع أوردرات كتير فى اليوم الواحد وكل مدينة أو قرية أو محافظة بيروح لها فى اليوم مش أقل من 8 شحنات وعدد كبير من الكتب»، وتقدم الدار عروضاً مخفضة ومجانية فى حال زيادة عدد مرات الشحن خلال فترة المعرض: «كمان بنوصّل الكتب للمحافظات بالنسبة للناس اللى ماتقدرش تزور المعرض بنعرف احتياجاتهم من الكتب وبنوصّلها لهم».

خدمة أخرى تقدمها هويدا حامد، مسئولة إحدى شركات الشحن، لمحبى القراءة، سواء داخل مصر أو خارجها، حيث تقوم بتنظيم رحلات لشحن الكتب داخلياً إلى مختلف المدن والمحافظات، بأسعار تتراوح بين 50 و100 جنيه، وتسمح بحمولات مختلفة تبدأ من 25 كيلو، كما تقوم الشركة بشحن الكتب إلى خارج مصر ولكن بعد الحصول على بعض التصريحات والموافقات: «فيه كتب دينية مش بتخرج غير بتصريح من الأزهر الأول وبعدين بنشحنها لأى مكان، وكل بلد وليها تسعيرة غير التانية على حسب بُعد المكان»، ويُعد معرض الكتاب بالنسبة إلى الشركة موسماً تنتعش فيه تجارتها: «ده موسم وكمان بنعمل فيه عروض مختلفة كل سنة، ولو فيه ناس بتطلب كتير جداً بنعمل لها خصم».