"هاكونا ماتاتا".. كتاب تنمية بشرية ينصح جمهور المعرض في دورته 51
"هاكونا ماتاتا".. كتاب تنمية بشرية ينصح جمهور المعرض في دورته 51
"هاكونا ماتاتا".. أغنية شهيرة من فيلم الكرتون "سيمبا"، اتخذتها الكاتبة فاطمة الزهراء إبراهيم، عنوانا لكتابها المكون من 16 فصلا، لتشارك في معرض الكتاب فى دورته الـ51.
و"هاكونا ماتاتا" جملة باللغة السواحيلي تعني "لا داعي للقلق" أو "مفيش مشاكل".
اقتنصت "فاطمة الزهراء" فكرة كتابها الذي يدور في مجال التنمية البشرية من الكرتون الشهير، وتحكي فيه عن مواجهة المشاكل وليس الهروب منها: "مهما هربنا من مشاكلنا لازم نواجهها ولازم نكون مش خايفين ولا قلقانين، ربطت الكتاب بجملة هاكونا ماتاتا اللي في الكرتون عشان بعد ما القارئ يقرأ الكتاب يفتكر الأغنية، يقول يعني أنا كده كده هاكونا ماتاتا لكل مشاكلي إن شاء الله"، بحسب تصريحاتها لـ"الوطن".
تقول "فاطمة" "في ناس بتشتري الكتاب عشان فكرة الاسم والكرتون، أو عشان حاجة خفيفة يمكن يضحكوا وهما بيقروه، وفي ناس بتسألني عن فكرته، فبوضح للناس معناه".
توضح "فاطمة" أن اسم الكتاب وغلافه الأصفر يلفت النظر إليه: "كل اللي بيستغرب الاسم بيبقى عنده فضول يعرفوا بيتكلم عن إيه".
وكشفت فاطمة عن أبرز فصول الكتاب قائلة: "كل فصل بيتكلم عن موضوع معين، أهمهم إن الواحد مينفعش يجي على نفسه أو اللي حواليه، والنفس والناس اللي بتشوف نفسها مش غلطانة، وفصل بيتكلم عن إن الشخص بطل حياته ويقدر يتحكم فيها، والإحباط ومسبباته وإزاي نتجاوزه، وفصل بيناقش السلبيات اللي بنكتسبها في الشغل والدراسة، وإزاي الشخص يعبر عن مشاعر الحب والغضب والكره"، بحسب فاطمة يتناول الكتاب تجارب شخصية حقيقية مرت بها بشكل يومي وبحثت لها عن حلول أو تجارب لأشخاص آخرين.
