"ساندي" صممت ناطحة سحاب مقاومة للزلازل: "هدفنا مركز متقدم"

08:00 م | السبت 18 يناير 2020

على بعد خطوات من مبنى كلية الهندسة بجامعة عين شمس، وقفت ساندى أشرف، الطالبة بالفرقة الرابعة قسم هندسة مدنى، برفقة عدد من زملائها وبجوارهم نموذج لمشروعهم الذى يقومون بتصميمه خلال السنة الدراسية للمشاركة فى إحدى المسابقات الدولية التى ينظمها معهد الهندسة للزلازل فى كاليفورنيا.

وقالت «ساندى» إن فكرة مشروعهم تتمثل فى تصميم نموذج لناطحة سحاب مقاومة للزلازل من الناحية الإنشائية والعملية، وفى الوقت نفسه صديقة للبيئة ومساحتها واقعية بحيث تكون قابلة للتنفيذ على أرض الواقع، حيث تشترط المسابقة التى تقام سنوياً بين أمريكا وكندا أن يكون التصميم الذى يتم المشاركة به مبتكراً وواقعياً، وتابعت: «إحنا طول السنة بنشتغل على مشروع بننفذه بحسب شروط المسابقة عشان نقدر نتأهل وننافس الفرق اللى بتقدم معانا، والسنة دى بنصمم نموذج معمارى مبتكر لمبنى قوى يستطيع تحمل قوة الزلازل، طوله حوالى متر ونص، وعملناه من خشب البلسا، والمشروع بيماثل المبنى الحقيقى وقابل للتنفيذ».

وأوضحت «ساندى» أنه بمجرد الإعلان عن المسابقة على الموقع الإلكترونى للمعهد فى أكتوبر الماضى، قامت هى وفريقها، المكون من 10 طلاب من تخصصات مختلفة، بمراجعة القواعد والشروط التى لا بد من توافرها فى التصميم، ثم بدأوا فى تنفيذ تصميم مبدئى للمشروع من الناحية المعمارية والإنشائية، فضلاً عن تحضير دراسة للتربة التى سيتم إنشاء المشروع عليها، وفى نوفمبر الماضى قاموا بإرسال تقرير عن اقتراحهم. وتابعت: «إحنا فى شهر أغسطس بنكوّن فريق من الكلية عشان نشتغل سوا على المشروع، بنبقى من تخصصات ودفعات مختلفة عشان نكمّل بعض، ولما المعهد نزّل قواعد المشاركة بدأنا نفكر فى تصميم يتناسب مع الشروط دى، وبعد ما انتهينا قدمنا فى المسابقة».

وبعد أسابيع قليلة من التقديم حصلت «ساندى» وفريقها على موافقة للمشاركة فى المسابقة الدولية التى ستعقد فى مارس القادم بمشاركة 50 جامعة من مختلف دول العالم ليصبحوا أول فريق من الوطن العربى وأفريقيا يشارك فيها، وأضافت: «هنسافر أمريكا أو كندا فى شهر 3 وهنافس جامعات عالمية فى أفضل مشروع مقاوم للزلازل، هناك بيحطوا النموذج بتاعنا على جهاز بيتحرك نفس حركة الزلازل وبيشوفوه إن كان هيتحرك ولا لأ، وخصوصاً آخر دور فى المبنى لأنه أكتر دور بيتهز لما بيحصل أى زلزال، ولو كان مطابق للمواصفات والشروط هناخد مركز». وأشارت «ساندى» إلى أنها تشارك فى هذه المسابقة للسنة الثالثة على التوالى، ففى العام الماضى نافس فريقها بمشروع آخر متعلق بالزلازل وتمكن من التأهل والسفر إلى كندا، حيث حصلوا على المركز الثانى فى الترتيب العام، والمركز الخامس فى التصميم المعمارى، والسادس فى مهارات التواصل، فضلاً عن أنهم حصلوا على المركز السابع فى المشروع الأقل تكلفة.

وأضافت: «لما سافرنا عملنا عرض لفكرتنا، وطبعاً الموضوع مابيكونش سهل علينا لأن شغل سنة كاملة بيتقيم، وبيكون معانا فرق من جامعات عالمية شهيرة، لكن الحمد لله السنين اللى فاتت كانت جامعتنا الأفضل وقدرنا نرفع علم مصر وأخدنا مركز، وبنتمنى السنة دى نحقق مركز أفضل».

تكلفة سفر الطالب إلى أمريكا 30 ألف جنيه على نفقتنا الخاصة.. و"عايزين حد يدعمنا مالياً"

وعن المشكلات التى يواجهونها خلال تنفيذ مشروعهم، قالت إن أبرزها يتمثل فى تكلفة السفر التى يتحملونها على نفقتهم الخاصة، والتى تصل لـ30 ألف جنيه للطالب الواحد، وهو الأمر الذى يعوق بعضهم عن اتخاذ هذه الخطوة رغم تأهلهم، مشيرة إلى أنهم يسعون إلى البحث عن جهات تدعمهم مادياً حتى يتمكنوا من السفر: «بنحاول نتواصل مع شركات خاصة فى الإنشاء والتشييد وبنشرح لهم فكرة مشروعنا وبينبهروا بيها لكن للأسف ماحدش دعمنا رغم إننا واخدين مراكز على مستوى العالم، وده بيخلى ناس مننا ما تقدرش تسافر مع إن لازم الكل يكون موجود فى المسابقة لأننا بنبنى النموذج هناك من الأول قدام اللجنة، عارفين لسه هنعمل إيه».