"تاه في ألمانيا".. عصام الحضري يحكي موقفا طريفا لمعسكر الأهلي الخارجي

11:03 م | الأربعاء 15 يناير 2020

احتفل عصام الحضري، حارس مرمى المنتخب المصري والأهلي والزمالك السابق، بالأمس، بعيد ميلاده الـ47، لذلك نرصد لكم كواليسه في معسكر الأهلي الخارجي بألمانيا.

رحلة عصام الحضري من القاهرة حتى الوصول للبعثة في ألمانيا

وكشف عصام الحضري في برنامج "صاحبة السعادة"، في لقائه مع الفنانة إسعاد يونس، عن كواليس سفره إلى ألمانيا بمفرده بعد تأخره عن البعثة بسبب إنهاء بعض أوراق الجيش، قائلا: "فوجئت بعماد اليماني، المدير الإداري السابق بالأهلي بيقولي يلا يا حضري الشنطة بتاعتك أهي، وفيه حاجات لازم تعملها علشان هما سافروا، وبعثة الأهلي سافرت ألمانيا وتاهوا في المطار بسبب حجمه الكبير".

وأضاف: "عماد اليماني أعطاني فلوس الشهر، وأخبرني أن الكابتن محسن طنطاوي سايبلي الورقة دي فيها رقم واحدة، هنكلمها من هنا وهي هتظبطلك كل حاجة في المطار، فقمت بالرد عليه وهو أنا هسافر ألمانيا لوحدي إزاي والبعثة تاهت، قالي هنتصرف".

وتابع: "وصلت المطار وقابلت البنت هناك، وقالتلي هتركب من هنا لألمانيا وتخلي الرقم ده معاك (36 A) وتمشي على السهم اللى عليه في لما توصل".

وواصل: "وصلت مطار فرانكفورت ورأيت السهم اللي بيشير للرقم (36 A) نازل لتحت فنزلت لقيت مترو ركبت فيه ولما نزلت لقيت السهم متجه لأعلى فوجدت الرقم روحت قاعد هناك وقمت بإعطائه لبنت فقطعته، وبعدها ركبت طائرة للبلد المتواجد بها معسكر الأهلي".

واستطرد حديثه قائلا: "الكابتن محسن كان كاتبلي العنوان على ورقه، وأول ما وصلت لقيت تاكسي فاتحلي الباب ركبته وقمت بالإشارة على الورقة قولتله عاوز اروح العنوان ده، وصلنا بعد أكتر من ساعة بدون ما نعرف نوصل للمعسكر، ولكن بعد ما لفينا 6 فنادق لقيت حد لابس ترينج أحمر فقولتله يوقف، فقعد يقول أسماء بالألماني لغاية ما قال شوبير قولتله استني، وبصيت لقيت الكابتن ثابت البطل والكابتن إكرامي ومحسن، فنزلت وقابلتهم في المعسكر".

وأكمل: "الكابتن محسن كان بيقول للاعبين قبل ما أوصل إحنا توهنا أمال الحضري هيعمل ايه، فالكابتن شوبير قالهم متخافوش هيوصل".