منقذ فتاة المنصورة: "اتحدفنا بالطوب وأزايز البيرة"

07:54 م | الجمعة 03 يناير 2020

روى سلامة أحمد سلامة، الشاب الذي أنقذ "فتاة المنصورة" من التحرش، تفاصيل إنقاذه هو وأصدقائه للفتاة، وقال إنه كان موجودًا رفقة أصدقائه في منطقة مخصصة للمشي حيث وجدوا تجمهرًا مفاجئا حول فتاتين.

وأضاف خلال حواره مع الإعلامية ياسمين سعيد، مقدمة برنامج "الجمعة في مصر"، عبر شاشة "mbc مصر": "مرة واحدة لقينا البنتين في النص والكل حواليهم وبيزقوهم جامد عن سور الجامعة، حجزنا عليهم وجريوا، ودخلوا محل موبايلات، دخلهم ولقى العدد كبير فخاف، اللي حدف طوب وزجاجات بيرة، كتير منهم كانوا شاربين".

وتابع: "المنظر ميرضيش ربنا، والبنتين مكنوش بيعملوا حاجة غير إنهم يصرخوا، دخلناهم بيوتي سنتر استخبوا فيه، والعدد زاد، وكل ما نمشي الناس تمشي وبعدين ييجوا عددهم كبير، لكن بعدها جه واحد تبع البنات دي، وعملنا مع صحابي سلسلة، واحدة منهم خرجت بعربية".

ولفت إلى ملابس الفتاة عادية بالنسبة لملبس فتيات مدينة المنصورة، موضحًا: "لكن ساعة اللمة كله بيزيط في الزيطة".

وحول الفتاة التي بقيت، حتى نهاية الواقعة وجرى تداول مقطع الفيديو الخاص بها، قال "سلامة": "في الأول كله كان داخل عليها، لحد ما زقوها في جدار الجامعة، كان فيه يافطة عليها بوسترات، ووقعوا الخشب عليها، وقعدنا من 12.30 للساعة 3 نحارب وسط كل دول، اتحدف علينا أزايز خمرة وطوب، قلعنا الحزمة ووقفنا الكل عشان محدش يجري وراها".

وواصل: "كان كل واحد فيهم داخل ياخد حتة ويمشي، زي الزومبي، اللي كان داخل عليها ولقى في تصوير فعمل إنه بينقذ عشان ميطلعش وحش في الآخر، واللي كان عاوز ياخدها في عربيته".