السيسي للمصريين: هفضل أنبهكم.. مفيش خطر على مصر إلا من داخلها

11:46 ص | الثلاثاء 03 ديسمبر 2019

قال الرئيس عبدالفتاح السيسي إنّ ظاهرة البناء العشوائي أضرارها كثيرة، وطالت قطاعات الصرف الصحي، المياه، الكهرباء، والغاز الطبيعي.

وأضاف السيسي خلال افتتاح مشروعات قومية في دمياط: "في مناطق مش قادرين ندخل فيها الغاز، ونريح الناس وتكلفة تبقى اقتصادية لينا، عشان المناطق مش آمنة".

وأضاف رئيس السيسي موجهًا رسالته للحكومة والإعلاميين والشعب المصري: "لما نتكلم عشان التحدي، وكل مرة هكرر الكلام، مفيش تحدي خطر على مصر إلا من داخل مصر"، متابعا: "أرجو إنكم تبصوا في المنطقة حولنا وتشوفوا، لما يتحرك الناس قادرين إنهم يهدوا بلادهم، طب وهو في حاجة عندك؟ لا معنديش، وهو أنا هستنى لما يبقى عندي وأنبهكم، هفضل أكرر وأكرر وأكرر الموضوع ده، حتى يبقى عندنا مناعة إن حد ياخدنا ويخلينا نهد بلدنا وندمرها".

وواصل الرئيس السيسي: "هفضل أكررها عشان أبقى عملت اللي عليّا مع الناس في مصر، وفهمتهم أد إيه خطورة والضرر اللي بينتج عن التحرك، فالدولة تبذل جهدًا جبارًا لإقناع المصريين بأنّها تتحرك بمعدلات".

وأردف: "كل مرة هتكلم هكرر الكلام ده، وأتمنى من كل المسؤولين يكرروه عشان المناعة والشباب الصغير اللي لسه طالع".

وشدد الرئيس السيسي على ضرورة نشر التوعية في الجامعات، المدارس، المساجد، والكنائس: "مصر بينا واستقرارنا نقدر نعمل كتير، دلوقتي مفيش حاجة، أنا مش ببص على دلوقتي خالص، أنا ببص على بكرة وبعده والسنين الجاية، طول ما في استقرار، خلال احنا اتحركنا وفيش عودة مرة تانية للخلف".

وعن تكلفة إنشاءات قطاع الكهرباء خلال السنوات الخمس الأخيرة، قال رئيس الجمهورية: "لو حطينا محطة الضبعة نبقى بنتكلم في تريليون جنيه، على ما نخلص المرحلة الأولى".

وأتمّ الرئيس السيسي: "اتحركنا بشكل أكثر من رائع وسنستمر فيه بجهد المصريين وصبرهم، كنا في وضع اقتصادي كارثي في 2016 والآن أصبحنا أفضل كثيرًا".

ويفتتح الرئيس عبدالفتاح السيسي اليوم، عدد من المشروعات القومية بمحافظة دمياط، بحضور عدد من الوزراء وكبار رجال الدولة، وهما مدينة دمياط للأثاث، ومحطة متعددة الأغراض بميناء دمياط، إضافة لعدد من الوحدات السكنية بمدينة دمياط الجديدة، ومركزا للتعليم المدني، وفندق منطقة اللسان، الذي يعتبر أول فندق 5 نجوم بمنطقة محافظات الدلتا.