بعد خفض البنزين.. ركاب يطلبون تخفيض الأجرة وسائقون:"ريّح الزبون"

07:59 م | السبت 05 أكتوبر 2019

بعد انخفاض أسعار البنزين بأنواعه الثلاثة 25 قرشاً للتر الواحد، سادت حالة من الجدل بين الزبائن وسائقى الميكروباص فى بعض المناطق الشعبية، نتج عنها بعض المشاحنات، لرغبة الزبائن فى تخفيض الأجرة، وفيما وافق بعض السائقين، رفض البعض الآخر.

«أى زيادة كانت بتحصل فى أسعار الوقود، السائقين كانوا بيغلوا فى سعر الأجرة، إحنا نفسنا مع أى حالة انخفاض نحسّ أن الأسعار بتقل، إحنا بنطالب بحقنا، وبنحاول نضغط على السواقين ونفاصل»، كلمات محمد عبدالتواب، أحد الركاب، مؤكداً أن أهالى المنطقة اتّفقوا على مطالبة السائقين بتخفيض الأجرة: «إحنا الأجرة بـ4 جنيه، السواقين بياخدوها أكتر من مرة، اللى راكب من أول الخط زى اللى راكب من نصه، بيلموا الأجرة بتاعتهم أكتر من 3 مرات فى اليوم».

"عبدالتواب": مع كل زيادة بنزين بيرفعوا الأجرة.. ليه مايخفّضوش دلوقتي؟

حالة التمرد على الأجرة، لمسها بعض السائقين بمنطقتى إمبابة والهرم، إبراهيم محمد، سائق فى خط إمبابة، قرر أن يرفع شعار «ريح الزبون»، ليُنهى حالة الجدال بينه وبين الزبائن: «باحاول أريّح دماغى من ناحية الزباين، باوفر على نفسى الخناقات، الربع جنيه أو النص اللى بيفاصل فيه مش هو اللى هيزود لى الأجرة». «إحنا فقدنا الثقة بينا وبين الزباين»، كلمات سعد عبدالحافظ، سائق ميكروباص، مؤكداً أن انخفاض أسعار البنزين وفّر معه 5 جنيهات يومياً: «كل يوم بافول ما يقارب 20 لتر، الناس مفكرة إننا اتوفر معانا فلوس كتير، لكن هى حاجة بسيطة جداً».