ضوابط الحكومة لـ"أوبر وكريم" تسعد المواطنين وتغضب السائقين: "هنقعد في البيت"
ضوابط الحكومة لـ"أوبر وكريم" تسعد المواطنين وتغضب السائقين: "هنقعد في البيت"
تباينت آراء المواطنين وسائقي شركتي "أوبر" و"كريم" فيما يخص الضوابط التي أقرها مجلس الوزراء أمس، حول خدمات النقل البري للركاب باستخدام تكنولوجيا المعلومات.
ومن أهم تلك الضوابط، حسن اختيار السائق من الناحية الأخلاقية والمهنية عن طريق سحب عينات عشوائية للمخدرات والكحوليات، مع الاهتمام بحالة السيارة وتطبيق تخفيض سنة الصنع ليصبح أكبر تاريخ صنع للسيارة مر عليه 5 سنوات، يجري تطبيقه تدريجيًا حتى 2024.
"إسلام": العينات العشوائية ستجبر مدمني المخدرات على التراجع
المواطنون أعربوا من جانبهم عن سعادتهم من الالتزامات التي فرضتها رئاسة مجلس الوزراء، ويقول "إسلام محمد"، 30 عامًا، أخصائي نظم ومعلومات بجامعة مودرن أكاديمي، إن التحاليل العشوائية للسائقين مهمة للغاية، وتشعره بالآمان أكثر أثناء استقلال السيارة مع سائقي "أوبر" و"كريم"، "أي حد هيفكر يشرب حاجة من دول هيتراجع بسبب خوفه من العينات العشوائية، ودي بتميزهم عن سواقين التاكسي اللي محدش بيراقبهم".
وعن رفع مستوى السيارات المستخدمة، قال "إسلام": "العربيات كلها هيبقى التكييف فيها شغال والعربية مريحة أكتر، وموضوع الخمس سنين ده، هيضمنلنا إننا نركب عربيات حديثة مميزة عن التاكسي".
"أسماء": هيزود ثقتنا في أوبر وكريم.. وهنبقى مطمنين أكتر
أما "أسماء سليمان"، 23 عامًا، تسكن بمنطقة مدينة نصر، وتعتمد أسرتها على استخدام أوبر وكريم بشكل أساسي، أعربت عن رضاها التام من ذلك القرار، "هيبقى فيها آمان أكتر، وهيزود ثقتنا في أوبر وكريم، وهنبقى مطمنين وإحنا راكبين معاهم، وفي ناس فعلا ركبنا معاهم وكانت طريقة في الكلام غريبة جدا"، مؤكدة أن فحص السيارات ورفع كفاءتها سيرتقي من الخدمة التي تقدمها تلك الشركات تجاه المواطنين.
وترى "أسماء" أن تاريخ الصنع ومدة الـ 5 سنوات ستكون ظالمة للكثير من السائقين، وأن الأهم هو الفحص الشامل للسيارة وحالتها وعدم الاعتماد على تاريخ الصنع أو الموديل، "ممكن تبقى في عربيات موديلها اكتر من 5 سنين بس هي نضيفة وحالتها كويسة جدا، مينفعش نقول إنها تخرج بره أوبر وكريم، وبكدة هنظلم الناس اللي معاها عربيات اقدم شوية ومش هتعرف تشتغل".
أما سائقي شركتي أوبر وكريم فأعربوا عن غضبهم وحزنهم الشديد من بند تاريخ صنع السيارة، حيث أوضح "باسم بشير"، 32 عامًا، سائق بشركة كريم، أنه اشترى سيارته موديل 2018 بالقسط على مدار 5 سنوات، "أعمل أنا فيها ايه دلوقتي أروح أرميها، ولسه عليها أقساط، وده مش أنا لوحدي ده معظم اللي شغالين في أوبر وكريم جايبين العربيات بالقسط"، مشيرًا إلى أقل سعر سيارة في الفترة الحالية 200 ألف جنيه، وأن البديل عن بند تاريخ الصنع هو البديل الفحص السنوي لجميع السيارات التي تعمل بالشركتين، قائلا: "ده فعلا بيحصل في أوبر وكريم، وبيشوفوا كل حاجة في العربية زي الكاوتش والتكييف والبطارية".
وأكد "باسم" أنه لا أحد يعمل بالشركتين دون عمل تحاليل المخدرات والكحوليات، مضيفًا: "بالنسبة للعينة العشوائية دي حاجة كويسة جدا واللي يتثبت عليه الموضوع ده، يتم تحذيره ولو أتكرر تاني يمشي خالص".
"سعيد": لو اتطبقت عربيات كتير هتترفض.. ومش هيكون ليها سعر لو فكرنا نبيعها.. وغالبية السائقين مش هايقدروا يشتروا موديل أعلى
أما "محمد سعيد"، شاب ثلاثيني، ويعمل سائق في شركة أوبر منذ 3 سنوات، أكد أن غالبية النقاط التي أوصت بها رئاسة الوزراء يجري تطبيقها بالفعل، "السيارة بتتفحص، والتحاليل دي عملناها كلنا، وده أو مستند بيطلب مننا من أول ما اتعملت أوبر في مصر"، مشيرًا إلى أن الجديد فقط في التحليل العشوائي للسائق، وسيضمن التزام أكثر من جانب السائقين، وأن شركة أوبر تتعامل مع السائق بكل حسم وجدية ولا تقبل أي تجاوزات، "لو حد من الركاب عمل في شكوى أو تقييمه انخفض بيتم إيقاف حسابه".
وعن بند تاريخ الصنع ومدة الـ 5 سنوات، قال "سعيد": "كدة 90% من اللي شغالين فيها هيقعدوا في البيت، لأن معظم الناس اللي اشتريت سيارات ده كان على أساس أن أوبر بتقبل من موديل 2007، ولو أتطبق القرار ده.. العربيات دي هتترفض، ومش هيكون ليها سعر لو فكرنا نبيعها، وغالبية السائقين مش هايقدروا يشتروا موديل أعلى".
