شكاوى من نفاد رصيد العدادات الذكية في كفر الشيخ.. والكهرباء: رشدوا الاستهلاك

04:09 م | السبت 03 أغسطس 2019

"نفاد أرصدة كروت الشحن".. أزمة جديدة يعيشها سكان بعض مناطق محافظة كفر الشيخ، بعد نفاد أرصدة العدادات الذكية في غضون أيام قليلة، ما أدى لتقدم بعضهم بشكاوى لشركة الكهرباء، بينما تجمع آخرون أمام منافذ شحن العدادات الذكية، للاستفسار عن كيفية نفاد الأرصدة بعد الشحن مباشرة، مؤكدين أنّهم لم يستهلكوا الأرصدة.

مواطنون "بنشحن وتاني يوم مبنلاقيش رصيد".. والكهرباء: "الضريبة والسلف وزيادة الاستهلاك السبب"

محمد خضر، أحد أبناء مركز دسوق، يقول إنّه شحن الكارت الذكي يوم 27 يوليو الماضي بـ100 جنيه، وفوجئ أمس بنفاد الرصيد: "الكهرباء فصلت بعد 3 أيام بس، وبعد خصم قيمة الضريبة إلكترونيا، كنت الأول بشحن بـ50 جنيه، دلوقتي بشحن الضعف وفوجئت إن مفيش رصيد ومش عارف السبب، رحت منفذ الشحن قالولي دورنا بينتهي عن الشحن، روح اشتكي في الكهرباء".

يضيف خضر: "الشركة بتخصم الضريبة إلكترونيا في نهاية كل شهر، كل مواطن مُصنف على شريحة معينة، والضريبة ثابتة والاستهلاك بيحكم، ومن فترة وأنا بشحن 100 جنيه شهريا، لكن اتفاجئت إن الرصيد خلص، طب إزاي؟"، مناشدا شركة الكهرباء بإصدار بيان توضيحي للمواطنين عما يحدث من خصم أرصدتهم.

أما عماد الشهاوي، وهو من أهالي مركز الرياض، يقول إنّه شحن كارت العداد بـ50 جنيها أول أمس، وفوجئ بأنّ العداد به 6 جنيهات فقط: "استهلاكي للكهرباء قليل، واللي حصل معناه إني لازم أشحن بأكتر من 400 جنيه عشان أكمل الشهر، رحت لشركة كهرباء الرياض وملقتش رد المسؤولين، عاوز حد يرد عليا رصيدي بيروح فين، وأنا على الشريحة رقم كام؟".

يوضح الشهاوي: "محدش عارف حاجة، بنشحن وخلاص، الأرصدة بتتسحب واستهلاكنا ثابت، أنا بيتى مفيهوش استهلاك كتير، معنديش تكييفات كل اللي عندي مراوح وتلاجة وتليفزيون، وعايش في شقة مساحتها 120 متر، إزاي يكون استهلاكي بالقيمة دي؟، قالولنا في ضريبة شحن بتتخصم إلكترونيا، فوجئنا بخصم الضريبة بأكثر من 35 جنيه، لكن مفيش فايدة الأرصدة بتتسحب من غير سبب".

سامح الشبراوي، أحد أبناء كفر الشيخ، يقول إنّ مشكلة نفاد رصيد الكارت الذكي تتكرر منذ شهرين، وأنّه ذهب لمسؤولي الكهرباء للاستفسار ولم يجد إجابة، قائلا: "كان معايا في العداد 8 جنيه، وشحنت 100 جنيه وأنا واقف جنب العداد بلف لقيت الرصيد 48 جنيه من غير استهلاك، يعني خصم مني 60 جنيه أول ما شحنت، رحت شركة الكهرباء عشان أبلغ الموظف قالي منعرفش حاجة في العدادات الجديدة، وبعتني للمدير اللي قالي ده فرق استهلاك، قلت له ازاي يعني ده لسه بحط الكارت اداني 48 جنيه، قال لي مش عارف حاجة عن العداد".

المهندس عاصم القطان، مدير شركة كهرباء كفر الشيخ، قال إنّ الشركة وصلتها أكثر من شكوى عن نفاد الأرصدة، وبعد بحث المشكلة تبيّن عدم ترشيد الاستهلاك، إضافة إلى (استلاف) المواطنين، وعند الشحن يتم سحب السلف إلكترونيا مثل الموبايل، مؤكدا: "لو استلفت رصيد أول ما بتشحن بيتخصم أتوماتيك، ولا يمكن التلاعب في العداد، والأهالي استهلاكهم بيزيد مش بيقل".

وأوضح القطان: "الأهالي بيشحنوا آخر الشهر في الشريحة العالية، وبالتالي قيمة الشحن والخصم بتزيد، إنما الشحن في بداية الشهر بيقلل فرص وضعهم على الشرائح العالية، ومن منتصف الشهر حتى نهايته بتزيد الشرائح، فضلا عن خصم الضريبة إلكترونيا نهاية كل شهر من الرصيد الموجود في العداد، وإذا لم يكف الرصيد الموجود لخصم الضريبة يتم الخصم مع بداية شحن الكارت مرة أخرى".