أحمد إبراهيم ينفي عودته لزوجته الأولى ويهاجم صحفية نشرت خبرا كاذبا

05:49 م | الأحد 30 يونيو 2019

نفى الموزع الموسيقي أحمد إبراهيم الشائعات التي انتشرت حول عودته إلى زوجته الأولى ياسمين عيسى وانفصاله عن الفنانة أنغام.

وأصدر إبراهيم بيانا ينفي شائعة عودته لزوجته الأولى، وهاجم الصحفية التي نشرت الخبر، وجاء البيان كالتالي: "هي مش أم أولادي بعتتلك وقالتلك أنفي الخبر على لسانها وإنك غير مصرح ليكي تتكلمي عن حياتها الخاصة ؟ مش هي صاحبة الشأن ؟".

وأضاف الموزع الموسيقي: "وبعيد بقى عن صحة الخبر من عدمها لأنها ماتخصش حضرتك ولا المتابعين لأن حياتهم فيها ما هو أهم أكيد.. مش المفروض لما صاحبة الشأن تنفي خبر وتطلب منك زي ما كتبتي خبر من غير ما ترجعيلنا تتأكدي لأنه أمر شخصي ليا وأولادي وبيتي إنك تنفيه على لسان صاحبة الشأن زي ما كتبتيه ولا سيباه ينتشر؟ هيفرق معاكي صحة الخبر من عدمها في إيه هو انتي اللي هتصرفي على أولادي ولا عايشين عندك في البيت على حسابك؟".

تابع :"حضرتك قاصدة تحرجي أم أولادي وتستفزي أهلها بالخبر ده إنها رجعت بعد إعلانها طلاقنا بسبب زواجي (اللي أنا بلغتها بيه واديتها حرية الاختيار)، ولا عاوزة تخلي الناس تتهمها إنها كانت عاملة فيلم غاوية شهرة ولم تعاطف وفي الآخر رجعتلي؟، ولا قاصدة تحرجي زوجتي المشهورة وتحطي اسمها في الخبر عشان تحرجيها وتبقى مسار للهري من شوية المرضى اللي في مجتمعنا الحشري ولا انتي فاكرة الناس طيبين قوي هيقولوا عليها جدعة اتصرفت بحكمة واحترمت خصوصياته مع أولاده وهيسيبوها في حالها؟".

أضاف: "ولا قاصدة تطلعيني أنا بلعب وعاوز ألم عليا الستات وأعمل شو زي ما في أغبياء اتهموني رغم إني فضلت أداري خبر جوازي عن الإعلام شهور يعني مافيش أي نية للشو إلى أن تسرب الخبر من جانب أحد المقربين، ولا قاصدة تطلعيني ندمان على زواجي رغم أن أولادي ما زالوا في بيتي في رعاية أمهم في نفس شارع الاستوديو بتاعي وبشوفهم وأطمئن عليهم يوميا وبيقعدوا معايا أكتر ما كان بيحصل قبل الأزمة؟".

وتابع إبراهيم :"إيه هي الكرامة يعني اللي في مهنتك اللي تدي حق لحد يتكلم عن حياة غيره الخاصة ولا أنتم عاوزين الناس تكفر بكلام النبي وأوامر ربنا وآياته في عدم الخوض في حياة الناس؟، ليه مافيش احترام لبيوت الناس؟ إحنا لسه هنسخن الناس تاني والأغبياء يرجعوا يقولوا ساب بيته وعياله وسرقته من بيته والهجص والسفالة دي كاني عندي 3 سنين، مش كفايا ساكت على الكدب والتضليل من البداية ورفضت أدخل في خصومة مع أم أولادي والنتيجة إن علاقتنا اتحسنت كتير رغم حجم الأزمة اللي افتعلت من الإعلام".

واختتم إبراهيم حديثه قائلا: "إيه علاقة ظهوري أنا وزوجتي المشهورة كزوجين في برنامج بأننا كمواطنين مش من حقنا إن حياتنا الخاصه تُحترم؟ ليه نشعل فتنة تاني بعد ما تحملت أنا وزوجتي المشهورة التجاوزات عشان وعشان نعدي الأزمة لأن في أولاد والحمد لله مستقرين وسعداء".

وتابع: "واحدة في شهور عدتها وفي الرسالة بتقلك أنفي الخبر لأن علاقتنا ممتازة يعني انتي عشان تلمي الناس عليكي تبوظي الدنيا، هل حضرتك هتجيبيلي أنا وأنغام حقنا من التجاوزات اللي في تعلقات الحشريين في البوست عندك أو عند الناس اللي نقلت الخبر؟، لآخر مرة ماتتكلميش تاني في أمور بيتي من فضلك غير مصرحلك ولا لغيرك يا أستاذة يا فاضلة تكتب أو تتكلمي تاني عن حياتي الخاصة بأي خبر سواء صح أو غلط ده أمر شخصي بحت مش المفروض أبرر أو أنفي أو أنزل تأكيد دي حياتي أنا بس كفاية تجاوز بقى".