صلاح عبدالله ناعيا محمد أبو الوفا: "مش قادر أبطل عياط"

06:44 م | السبت 29 يونيو 2019

نعى الفنان صلاح عبد الله، الفنان الراحل محمد أبو الوفا، الذي توفي صباح اليوم السبت، بعد صراع طويل مع المرض.

وكتب "صلاح" عبر حسابه الشخصي على موقع التواصل الاجتماعي "فيس بوك": "عارف يا محمد أنا النهاردة صحيت من النوم، الساعة 3 مساء، وأول حاجة قلتها الحمد لله أخيرًا نمت كويس والورم في رجلي فش كتير وحاسس إني اتحسنت صحيًا بفضله وكرمه ومقبل على الحياة بابتسامة جوانية عريضة ولذيذة وعاقد العزم على مواصلة دعم منتخب بلدي في مواقع التواصل وفعلاً بعد الإجراءات العلاجية المعتادة يومياً فتحت الفيس بوك وأول حاجة شفتها صورتك يا محمد".

وتابع: "فاكر يا محمد المرة الوحيدة اللي قعدت فيها معاك قعدة طويلة أثناء التحضير لمشهد يجمعنا في مسلسل عائلة الحاج نعمان وكل ما تقولي يا أستاذ أقولك متقوليش يا أستاذ لأن أنت الأستاذ ووقفت في الاستوديو وقلت بعلو الصوت يا جماعة أنا ليا الشرف والفخر إني همثل دلوقتي قصاد الأستاذ محمد أبو الوفا"، مضيفًا: "عارف يا محمد أول مرة شفتك في التليفزيون قعدت أقول لنفسي مين الراجل ده وكان فين الراجل ده وإزاي بيمثل بالحلاوة والبساطة وبالشكل ده الراجل ده وكل مرة كنت بقول نفس الكلام وأنا قاعد قصادك زي التلميذ يا أستاذ".

وأضاف: "فاكر يا محمد لما قلت لك أنت كنت فين يا جدع أنت وإزاي وليه ده أنت المفروض تكون في حتة أكبر بكتير من اللي أنت فيها اسمًا وأجراً وشهرة في حتة أكبر كتير من اللي إحنا فيها أو بالتحديد من اللي أنا وصلت ليها وترد بضحكة عسل مالهاش زي بترن دلوقتي جوايا وأنت بتقولي بطل تواضع يا أستاذ وأقولك ناني ماتقوليش يا أستاذ ودا مش تواضع والله ده إقرار بالحقيقة والله إقرار واعتراف بالحقيقة يا محمد يا أبو الوفا".

وأكمل صلاح عبد الله، رسالته، بقوله: "عارف يا محمد والله العظيم أنا مش عارف ليه كتبت كل الكلام ده في نعيك أنت بالذات ومش عارف ليه لغاية دلوقتي مش قادر أبطل عياط مع إني ماعرفش عنك غير إنك ممثل عظيم ظهر متأخرًا ورحل مبكرًا وشفت في عينيه لما قعدت وياه إن الدنيا دي مش فارقة معاه ولأني بدأت أتعب يا أبو الوفا هختم برسالة ليك يا أستاذ.. فاكر يا محمد لما قلت لك أنت المفروض تكون في حتة أحسن كتير أهو أنت دلوقتي يا حبيبي في الحتة الأحسن والأفضل والأجمل والأنضف والأبقى والأحلى والأعلى بإذن الله ورعايته ورحمته وفضله وكرمه".

يذكر أن الفنان محمد أبو الوفا تعرض لوعكة صحية شديدة منذ فترة، دخل على إثرها العناية المركزة بالمستشفى، ويعرض له حاليًا الجزء الثاني من مسلسل "أفراح إبليس" على إحدى القنوات المشفرة، وهو من بطولة جمال سليمان وصابرين.