طبيب أسنان يوفر خدمة العلاج بالتقسيط مراعاة لمحدودى الدخل

08:47 م | الثلاثاء 18 يونيو 2019

«العلاج بالتقسيط»، قرار اتخذه عمرو أنور، طبيب أسنان، للتخفيف عن مرضاه من مدينة المحلة الكبرى، فى ظل ارتفاع أسعار كشف وعلاج الأسنان فى الآونة الأخيرة: «الواحد بيحاول يساعد الناس، وفى نفس الوقت عجلة الشغل تدور، طول ما إحنا بنغلّى على بعض، الدنيا مش هتمشى، وربنا مش هيبارك فى العمل والرزق».

الوجع المبرح الذى يسبّبه ألم الأسنان، كان دافعاً قوياً لتنفيذ «عمرو» لفكرته: «ماينفعش أشوف مريض بيتألم، وماقفش جنبه وأساعده، وفيه أوقات كتيرة باشخص حالات عن طريق الإنترنت مجاناً، وساعات ناس بتتعب بالليل أو بتكون مسافرة، وباحاول أساعدهم على قد ما أقدر».

حدد «عمرو» سعر الكشف داخل العيادة بـ50 جنيهاً: «باخد فلوس الكشف والجلسات بالتقسيط، ومن غير فوايد»، ويحاول التخفيض فى الأسعار باستمرار: «أنا وغيرى بنساعد حالات كتيرة غير قادرة كل شهر، وممكن نعالج حالتين أو ثلاثة مجاناً، ولمختلف مشاكل الأسنان، مثل تنظيف الجير، تلميع، حشو عصب أو تقويم».

نظام التقسيط داخل عيادة «عمرو» لا يقتضى تقديم المريض لأى ضمانات: «أنا مش باخد أى ورقة ضمان من حد، أنا باقدم خدمة لوجه الله، غلاء أسعار خامات علاج الأسنان بقت تخلى مرضى كتير تمتنع عن زيارة العيادة أصلاً، إحنا بنحاول نحافظ على صحة الناس فى الحدود اللى نقدر نقدمها لهم».

وحسب «عمرو»، فإن «أنا وابن عمى بنساعد الغريب»، الجروب الذى أطلقته جمعية رسالة للأعمال الخيرية، ساعده على تنفيذ فكرته: «جبت منه حالات كتير محتاجة المساعدة وعالجتها».