«عيدية» شركات سياحة للمواطنين: رحلات يوم واحد.. وكعك هدية

07:58 م | الأربعاء 05 يونيو 2019

تقترن فسحة العيد بالسفر والرحلات، ما يخلق موسماً لشركات السياحة، التى عانت من ضعف الإقبال خلال شهر رمضان.

واستغلالاً للحدث احتفلت بعض شركات السياحة بعيد الفطر المبارك على طريقتها الخاصة، بتنظيم رحلات لمدة يوم واحد، إلى بعض المناطق والمدن الساحلية، على رأسها الإسكندرية ومارينا، ولم تكتفِ بذلك، إنما وزعت أطباقاً من الكعك والبسكويت بمذاقات مختلفة وشهية، على سبيل الـ«عيدية» لإسعاد المشاركين.

تكلفة اشتراك الفرد تتراوح بين 120 و150 جنيهاً شاملة الانتقالات

مفاجآت عديدة تقدمها إحدى شركات السياحة بمنطقة شبرا لعملائها فى العيد خلال الرحلات، منها إقامة حفلات وعروض رقص شرقى على الشواطئ: «السنة اللى فاتت عملناها والناس حبت الفكرة جداً، والسنة دى قررنا نشاركهم نفس الفرحة، ونعيّد على الناس، جبنا كعك وبسكويت وبيتى فور، ووزعناه على الناس فى الأوتوبيسات، عشان يحسوا بالعيد وهما مسافرين»، بحسب لطفى السيد، مسئول الشركة.

أسعار متوسطة حرصت الشركة على تحديدها، تتراوح بين 120 و150 جنيهاً للفرد، وتكون شاملة الانتقالات ذهاباً وإياباً: «الكراسى على البحر كمان بتبقى علينا، حجزنا مكان ودى جى، وشغّلنا أغنية (العيد فرحة) على الشاطئ، والناس فرحت جداً وحست بالعيد أكتر».

نفس طريقة الاحتفال، يحرص على تطبيقها مصطفى محروس، مدير إحدى شركات السياحة بمنطقة المهندسين: «لما الناس حجزت معانا الرحلة، عرّفناهم إن فطار العيد علينا، وكتبنا كده على صفحتنا بموقع التواصل الاجتماعى فيس بوك، وقلنا للعملاء يجيبوا الشاى باللبن بتاعهم، واحنا هنحلى بقهم بالكعك والبسكويت».

رغم بساطة الفكرة، وتوزيع كميات محدودة من حلوى العيد، لكنها تبقى وسيلة ساهمت فى خلق حالة مختلفة خلال رحلات اليوم الواحد، والشعور بفرحة العيد على الشاطئ: «فيه ناس جت الرحلة على حس الكعك والبسكويت والحاجات المختلفة اللى هتتعمل فى اليوم ده».

فقرة خاصة بالأطفال والسيدات توفرها الشركة أيضاً للمشتركين فى الرحلات، بتوفير «حنّانة» تقوم بعمل رسوم للحنة لهم فى آخر اليوم: «بتكون أسعارها بسيطة، واحنا اللى بنتفق معاها تشاركنا اليوم»، حيث تبدأ الرحلة فى الـ7 صباحاً، وتكون العودة فى الـ10 مساءً، وتم حجزها فى العشرة أيام الأخيرة من شهر رمضان: «معظم المشتركين فى رحلات اليوم الواحد بيكونوا من محافظات تانية».