حملة لسداد ديون المواطنين للبقالين والصيادلة: أكثر الغارمين سيدات
![صفحة «النوتة» خالية بعد سداد الديون](https://watanimg.elwatannews.com/image_archive/840x473/1993200011557430321.jpg)
صفحة «النوتة» خالية بعد سداد الديون
مع بداية شهر رمضان، قرر مجموعة من المتطوعين مضاعفة جهودهم فى سداد ديون الغارمين، عن طريق التجول على محال البقالة والجزارة والصيدليات فى المناطق الشعبية، ودفع الفلوس المستحقة عن المواطنين الذين يشترون بالأجل، لإنقاذهم من كاهل الدين وغرامة تأخيره أو العجز عن سداده. اهتمامها بمشاكل الفقراء جعلها تحب العمل التطوعى لحل مشاكل غير القادرين بمجهودها الشخصى، هدى حسن، من مدينة المحلة الكبرى، اعتادت على مدار ٣ سنوات ماضية، بالتزامن مع حلول شهر رمضان، أن تذهب لبعض المحال لفك ديون بعض الأسر: «بالف على محلات البقالة والصيدليات والجزارة طول شهر رمضان، كل أسبوع بخصصه لتغطية منطقة معينة، وبسدد الديون المسجلة فى كشف الأسامى اللى موجود عند التاجر بالكامل». عملها لقى ترحاباً كبيراً من جانب أصحاب الدين، والتجار، الأمر الذى دعاهم للمشاركة فى عمل الخير: «فى كتير منهم هما كمان بيفكوا زنقة الناس، بيسامحوا فى الفلوس اللى ليهم عشان ياخدوا ثواب فى رمضان». لاحظت «هدى» أن معظم الديون لسيدات: «معظم الغارمين سيدات إما زوجها متوفى، أو ظروفها الاقتصادية صعبة، أو بتعول أسرة».
مبادرات فردية وجماعية خلال رمضان
الفكرة نفسها تبناها فريق «إشراقة» فى مدينة دمنهور، وبحسب أحمد العقدة، مدير الجمعية التى تعمل على سداد ديون الغارمات: «إحنا حوالى ١٠٠ شخص متطوع لعمل الخير، بنسدد ديون السيدات بالجهود الذاتية، فيه ستات بيشتروا جهاز بناتهم بالتقسيط، وفيه أرامل ومطلقات بيشتروا احتياجاتهم الأساسية على النوتة، ولما بيتراكم عليهم مبلغ كبير مش بيعرفوا يسددوا».