ذكريات لا تنسى.. محمد صلاح: فطرت مرة ساعة بدرى.. وماكنتش بصوم فى أفريقيا
ذكريات لا تنسى.. محمد صلاح: فطرت مرة ساعة بدرى.. وماكنتش بصوم فى أفريقيا
أكد محمد صلاح، نجم الزمالك السابق، أن ذكرياته فى رمضان أحداث لا تنسى، وحكى: «وأنا لاعب كنت مِلك الفريق والمنتخب وقضيت رمضان فى المعسكرات والسفريات عكس وأنت مدير فنى بتلاقى وقت لأداء روحانيات رمضان عن طريق الصلاة والعبادة وزيارة الأقارب خاصة أنه فى فترات بتبقى مش مرتبط بتدريب فريق».
وأضاف: «ماقدرش أنسى مباراة البلاستيك اللى كانت بتتلعب الساعة 2 الضهر قبل الفطار وكان عندى امتحان فى جامعة عين شمس من 10 إلى 1 ظهراً، وإدارة الزمالك بعتت لى سيارة مخصوص قدام الجامعة والسيارة ودتنى استاد القاهرة بأقصى سرعة بعد ما خلصت امتحان ورغم إنى كنت صايم وقتها ورفضت الإفطار قدمت مباراة كبيرة والزمالك كسب 3-0 وصنعت هدفين لحسن شحاتة وفاروق جعفر، وعمرى فى حياتى منساش المباراة دى».
وعن ذكرياته مع المنتخب فى رمضان، قال «صلاح»: «فى بطولة أمم أفريقيا 1984 كان الجو حر وسافرنا كوت ديفوار وبصراحة سألنا فى مشيخة الأزهر عن إمكانية رخصة الفطار وقالوا لنا نفطر لأن السفريات زمان كانت متعبة جداً وبتستغرق من 24 لـ27 ساعة ولكن كنا بنفطر يوم المباراة بس وبنعوض الأيام دى قبل رمضان اللى بعده وبنطلع صدقة فى نفس الوقت وفيه لعّيبة كانوا بيصروا على الصيام، والصراحة أنا مكنتش منهم وعوضت قبل رمضان اللى بعده».
وواصل: «أتذكر موقف فى مايو أو نهاية أبريل خلال شهر رمضان وكنا مسافرين فى إحدى الدول الأفريقية والساعة كانت بتتغير وقتها ومكنتش أعرف ده ففطرت قبل ميعاد الفطار بساعة ولجأت إلى دار الإفتاء وأكدوا لى أن الصيام يجوز طالما أنى فطرت عن غير قصد بسبب عدم معرفتى بتغيير الساعة بشرط إخراج صدقة وده اللى عملته بالظبط».
