بريد الوطن| برج الحوت
بريد الوطن| برج الحوت
فى برج الحوت مولود
ودايماً حظى يقوللى
أنت تعيس منكود
وقليل البخت يا سادة
ف الكرشة يلاقى العضم
ولمَّا الحظ يجيله
بيصيبه بسوء الهضم
والهضم انا عندى ضعيف
محتاج دايماً فوار
محتاجنى كمان اتمشى
بعد ما أروق وأتعشى
ورصيف مكسور متدغدغ
اتكعبل فيه واتمرغ
وتراب الكون يتفرّغ
ع المخ يقوم يمحيه
مَ انا فقرى وحظى عوالم
والهبرة بتيجى لحدّى
من خرم الإبرة تفوت
تدينى بالسحتوت
رغم انى وربى بصلِّى
واستغفر ربى تملّى
شاكر فضله ولا أخلّى
وبعامل الناس مظبوط
ومآمن ولايوم أخوّن
وبراجع ايه يدوّن
ف صحيفتى قبل ما أموت
سامح لطف الله
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
