التصوير يمنع خالد الحلفاوي من حضور عزاء الجندي.. ونجله: "هجيلك تعزيني"

12:22 م | الجمعة 12 أبريل 2019

"عمل تافه يؤدى بمنتهى الحماس"، مرارة شديدة تصبغ كلماته التي تعبر عن صعوبة الوضع، كيف تفقد عزيزا وتكمل عملك كأن شيئا لم يكن، العمل أولا ثم تأتي الإنسانيات إذا سمح الوقت والظروف، تحدث المخرج خالد الحلفاوي عن الأمر دون مواربة، بعد وفاة الفنان محمود الجندي ووالد صديقه المخرج أحمد الجندي، واصفا عدم تمكنه من حضور العزاء بسبب انشغاله بتصوير مسلسل "من أول نظرة"، المشارك في سباق الدراما الرمضانية المقبل.

ونعى الحلفاوي، الفنان الراحل محمود الجندي، عبر حسابه على "فيس بوك"، ووجه حديثه إلى نجله المخرج أحمد لجندى، قائلا: "الله يرحم عم محمود، وربنا يصبرك يا أحمد يا جندى يا أغلى الناس على فراق أبوك، وآسف أني مش هاجى أعزى عشان لازم أصور".

تابع: "أعز الزملاء بالنسبة لي أبوه مات والعزا بالليل، مينفعش تروح تعزي عشان عندك تصوير الجمعة بالليل، ومينفعش توقف تصوير عشان مش هتلحق رمضان، كلمه عزيه في التليفون، هو أكيد فاهم أنك بتصور، عيالك مش بيشوفوك؟ مش مشكلة، عارفين أنك بتصور، عيان ومش قادر؟ مش مشكلة بس أنت هتصور، وافتك المنية وربنا خدك برضه العمل هيكمل وهيتصور".

وتطرق "الحلفاوي" خلال منشوره إلى الصعوبات التي يواجها العاملون في الصناعة، حيث توفى أحد مساعدي الملابس في المسلسل، موضحا: "شغلانة صعبة قوي اللي مبتقفش على حاجة أو على حد، هتكمل اليوم وهتشتغل عشان اليوم متكلف قد كده، أو عشان لو وقفت شغل النهاردة مش هتلحق الميعاد الفلاني، حد مات من العاملين بالمسلسل؟، ينفع نفركش النهاردة احتراما للوفاة؟ بنحاول، بس لأ مطلعش ينفع لأن الممثل الفلاني مش فاضي غير اليوم ده و بعد كدة مسافر، أو مكان التصوير مش متاح غير النهاردة، ولو أخلينا بده أو ده مش هنلحق نسلم في الميعاد، نقف دقيقة حداد وخلاص وبعدين نشتغل ونعمل كوميدي وندور على أفيهات بينما الزميل أهله بيدفنوه".

ولاقى منشور "الحلفاوي" تفاعلا كبيرا لدى العاملين في المجال الفني، سواء مديرين تصوير، مساعدين إخراج، ممثلين ومخرجين من بينهم أحمد الجندي نجل الفنان الراحل، الذي رد عليه قائلا: "حبيبى يا خالد، والله كلامك ده مش عارف أرد عليه لأنك قولت ما في النفوس، جبت الزتونه يعني، والله لو فيا نفس بعد العزا هاجيلك عشان تعزيني".