الدنيا ربيع.. والجو بديع.. لمحبى الهدوء: «مصيف» رغم الامتحانات وتقلب الطقس

07:30 م | الأحد 07 أبريل 2019

فى الوقت الذى يرفع فيه كثير من الأسر درجة الاستعداد القصوى تجهيزاً لخوض معركة امتحانات آخر العام، والإعداد لشهر رمضان الكريم، انشغل محبو الهدوء بتجميع أمتعتهم لبدء رحلة استجمام لا يعكرها زحام، ولا يفسد صفوها ارتفاع الأسعار، واستغلوا العروض التى تقوم بعض الشركات السياحية بطرحها خلال فترة الربيع للاستمتاع بإجازة هادئة ومريحة مرددين كلمات أغنية السندريلا: «الدنيا ربيع، والجو بديع، قفل لى على كل المواضيع».

اعتاد إسلام مكاوى، مسئول بأحد الشركات السياحية، على عمل بعض العروض السياحية مع بداية حلول أبريل وتحديداً مع اقتراب أعياد «شم النسيم»: «الناس اللى بتحب الهدوء هما أكتر ناس بتروح المصايف خلال الوقت ده، بتكون الرحلات رايقة جداً ومعظم الفنادق إشغالاتها قليلة».

تأتى مدينة «طابا» على رأس الأماكن السياحية الأكثر إقبالاً خلال موسم الربيع، بحسب «مكاوى»: «الإقبال عليها السنة دى حلو جداً، المكان يعتبر غالى شوية لأن مفيش لسه عدد كبير من الفنادق، وتنوع فى درجاتها، لكن هى لسه مش عليها ضغط وده بيجذب محبى الهدوء».

وتصل الأسعار فى مدينة طابا خلال فصل الربيع إلى 2000 جنيه للإقامة 3 ليالٍ: «فيه إقبال برضه على شرم الشيخ والغردقة والعين السخنة، والأسعار أقل بكتير، بتوصل لـ300 جنيه لليلة فى رحلة شرم الشيخ».

«الإقبال قائم على محبى الهدوء»، كلمات أوضح بها عادل عوض، مسئول رحلات، حالة السوق خلال فصل الربيع: «فيه دلوقتى رحلات اليوم الواحد، الإقبال عليها كبير جداً للعين السخنة والإسكندرية ورأس سدر، تصل أسعارها إلى 150 جنيهاً للفرد»، وبحسب «عادل» فإنه على الرغم من أن معظم الشركات قدمت عروضاً مغرية فإن الإقبال أقل من العام الماضى: «إحنا بنقدم عروض لكن الحالة الاقتصادية محجمة الناس شوية وكمان الامتحانات، مش بيطلع معايا فعلاً غير اللى عاوز يغير المود ومحتاج يسافر بدون ما يكون عنده ارتباطات ملحة».

تنتظر فاطمة عطية فترة الربيع كل عام للاستمتاع بالهدوء على شاطئ شرم الشيخ: «خلاص جوزت عيالى، ده أنسب وقت للسفر بالنسبة لى بعيد عن دوشة الأطفال، هدوء وراحة، وكمان الأسعار فى المتناول»، وصولها لسن التقاعد سهّل عليها الذهاب للمصيف فى الأوقات التى تشهد تخفيضات: «الأسعار بتكون أقل النص بالمقارنة بشهرى الذروة يوليو وأغسطس».