أكلات ومشروبات «صيامى» فى مطاعم شبرا: طول عمرنا واحد

09:07 م | الأربعاء 20 مارس 2019

«كريب صيامى»، «بيتزا صيامى»، «لحمة صيامى»، «عصير وآيس كريم صيامى»، منذ بداية فترة الصيام الكبير للأقباط، امتلأت جدران المحال بمنطقة روض الفرج بحى شبرا، التى يقطن بها أعداد كبيرة من الأقباط، بلافتات تنوه عن تقديم وجبات تتناسب مع ضوابط فترة الصيام، فى لفتة توضح تمسك أهل شبرا بطابعهم على مر السنين. «إحنا هنا بنتعامل مسلمين ومسيحيين كلنا واحد، ومفيش مناسبة بتعدى بينا من غير ما نتشارك فيها»، قالها مدحت خالد، صاحب مطعم بالمنطقة، والذى يحرص على تقديم الوجبات المناسبة للأقباط خلال فترة الصيام: «فيه ناس بتحب البيتزا بالنسبة ليهم روتين أسبوعى، مايقدروش يقعدوا 55 يوم من غير ما ياكلوها، وهكذا فى ساندوتشات البرجر، إحنا بنعمل أكل يرضيهم ويحسسهم بالسعادة، وفى نفس الوقت مناسب للصيام».

كريب وبيتزا ولحوم بفول الصويا.. والحلو آيس كريم وعصائر

وبحسب «مدحت» فإنه يقوم بعمل كل أنواع الأكلات من لحوم تصنع بالكنيسة: «اللحوم دى بتكون عبارة عن صويا مفيهاش أى روح وفيها تتبيلة ونكهة البرجر هو اللى بيديها الطعم، وبتكون مناسبة جداً للأقباط بتصبّرهم على عدم أكلهم للحوم، خاصة عشاقها».

«أسامة» صاحب محل عصير بالمنطقة نفسها

نالت الحلوى نصيباً أيضاً من أن تطرح بعض المنتجات منها بشكل صيامى، منذ بداية فترة الصيام، أعلن أسامة صادق، صاحب محل للمشروبات والآيس كريم، عن تقديمه «حلوى صيامى»: «بنقدم العصائر كلها منزوعة من أى دسم، سواء لبن أو شيكولاته أو كريمة، بتكون عصائر صافى».

وبحسب «صادق» فإن الأسعار تتراوح بين 5 و10 جنيهات: «الناس هنا متعودة تيجى تشترى من عندنا القنبلة الصيامى والفخفخينا الصيامى، فكرة إن الشخص بياكل نفس الحاجات اللى متعود عليها بيحس إنه مش محروم منها مدة طويلة، بنحاول نعمل كل حاجة من غير روح وبندور طول الوقت على بدائل»، يشتهر محل «صادق» بمنطقة روض الفرج على مدار الـ50 عاماً الماضية باهتمامه بالأقباط وقت الصيام: «مهم ندلع الزبون ونرضيه». «كريب صيامى»، لافتة يعلقها على جدران المحل الخاص به، تغرى محبى الكريب وعشاقه، محمد رمزى، صاحب أحد مطاعم الوجبات السريعة فى المنطقة: «الناس بتحب تنزل تتفسح وتتمشى بالليل وتأكل حاجة تسعدهم، بنحاول إننا نبسطهم وكلها حاجات على قد الإمكانيات المتاحة». وبحسب «محمد» فإنه يراعى عند عمله للعجينة والحشوات المستخدمة فى عمل الكريب أن تكون خالية من منتجات الألبان واللحوم والسمن: «بنعمل كريب بالبطاطس والخضار وطبعاًَ كله بالزيت، بيكون مختلف بس فى النهاية كريب، والأطفال خصوصاً بيحبوا ده جداً».