عيد الأم فى سور الأزبكية: مهرجان تخفيضات لأبناء المثقفات
عيد الأم فى سور الأزبكية: مهرجان تخفيضات لأبناء المثقفات
«كل سنة وانتى أهم حاجة فى حياتنا، كل سنة وانتى الخير لينا.. وليكم خصم على جميع أنواع الكتب 30% و50%».. بهذه الطريقة المختلفة، قرر بائعو الكتب فى سور الأزبكية، الاحتفال بعيد الأم، من خلال مهرجان كبير يمتد لـ3 أيام، بدأ أمس ويستمر حتى 20 مارس الحالى.
«ده مهرجان مقصود بيه الاحتفال بعيد الأم وفى نفس الوقت تنشيط حركة المبيعات، إحنا فارشين الـ3 أيام من 10 الصبح لـ10 بالليل، عشان الناس اللى هتيجى فى أى وقت هتلاقينا موجودين».. بحسب أحمد نصير، أحد الباعة، الذى كان أول المتعاونين فى هذا المهرجان بعرض أعداد من الكتب بتخفيضات كبيرة: «فى أمهات كتير بتحب الهدايا المميزة والمختلفة اللى شبهها زى أنها تحب تقرا وتتعرف على حاجات حواليها من خلال القراية، وفى غير الأمهات شباب وبنات بييجوا يستغلوا الخصومات ويشتروا لنفسهم». ويقدم المهرجان إصدارات حديثة من الكتب بالإضافة إلى الإصدارات القديمة لتلبية احتياجات كل القراء: «اللى بيحب القراءة هيلاقى تشكيلة كبيرة من الكتب بأسعار تتراوح بين 5 و20 جنيه».
«بعد النجاح اللى حققه المهرجان فى يناير الماضى بالتزامن مع معرض القاهرة الدولى للكتاب، كان لازم نعمل مبادرة تانية للناس فاستغلينا مناسبة عيد الأم»، بحسب يوسف أنور، أحد الباعة، الذى يقدم خصومات على كل الكتب تصل إلى 50%: «عشان عيد ست الكل خفضنا الأسعار، وفرصة للشباب إنهم يشتروا فى المهرجان ده لأن الأسعار حلوة»، ويشجع «يوسف» الشباب على شراء الكتب كهدية بديلاً عن الهدايا التقليدية: «فى نوعية من الأمهات بتفرح بهدايا الكتب بس إحنا اللى دايماً بنجرى على الكوباية والعبايات».
