"نيمو" يعيد الروح لفاتن حمامة وعمر الشريف بـ"ريشته" في شوارع المنصورة

02:55 م | الأحد 17 مارس 2019

يحب أفلاهما، نهر الحب، صراع في المينا وصراع في الوادي وغيرها، كما أن قصة حب فاتن حمامة وعمر الشريف بالنسبة لها مثالية، صادقة، فقرر أن يعبر فنان الجرافيتي، أحمد جابر الشهير بـ"نيمو" عن إعجابه لهما برسمة تجمعهما في المنصورة.

وكأن الروح عادت لهما بريشته قائلا: "رسمتها بمزاج، حبيت أنقل قصة حبهما القوية الجميلة واللي كل الناس بتحبها ومفيش خلاف في كده".

كل من يمر من أمام الجرافيتي يبتسم، يتذكر المشاهد التي جمعت بينهما في الأفلام، ويتذكر الزمن الجميل والأفلام القديمة، متابعا: "فعلا كل الناس بتحبهم، فيه ناس تشوف الصورة وتبتسم بسبب حبهم ليهم، وناس بتقولي حقيقية أوي".

اكتفى "نيمو" بأن تكون الرسمة بالأبيض والأسود حتى يحتفظ بواقعيتها: "ماحبتش ألونها، وحبيت انقلها للناس كده، ولقيت إعجاب من الناس بيها كده".

الصورة التي اختارها "نيمو" لنقلها على الحائط، لم يأخذها من فيلم، موضحا: "ماحبتش تكون من فيلم، حبيت تكون حقيقة، من الواقع من حياتهم العادية، وحبيت ارسمها زي ما هي علشان تبين المشاعر وتوصل للناس على طول".

اكتفى "نيمو" بالصورة، ولم يكتب وصف عليها: "فعلا مردتش اكتب عليها حاجة، فكرت أحط وصف، لكن في الآخر اكتفيت بالصورة بس، حسيت أنها ناقلة كل اللي حابب أقوله".

رسم "نيمو" الجرافيتي في يومين، وطوال فترة العمل، كان له طقوسه الخاصة بحسب قوله: "لقيت مقاطع لأفلامهم على الساوند كلاود، فبقيت اسمعها وأنا بعمل الديزاين، كنت حابب الحالة العامة للجرافيتي ده، من بداية الشغل لحد ما خلصته".

يرى "نيمو" أن لجرافيتي عمر الشريف وفاتن حمامة، معزة خاصة في قلبه، ويراها أيضا في أعين كل من يشاهده مختتما: "أصل مفيش خلاف علي حبنا ليهم، وقصص الحب زمان كانت جميلة، والأفلام القديمة كلنا بنحبها".