مطعم يعد بتوزيع ساندويتشات فول وطعمية فى حال فوز الزمالك

07:58 م | السبت 09 مارس 2019

اختار للمطعم الذى ورثه عن والده اسم «الزمالك»، رفع شعار ناديه المحبب على لافتته، رفض نصائح أقاربه بالفصل بين انتماء كرة القدم، و«أكل العيش»، بسبب تعصب عدد من الزبائن، فيسبب له الخسارة فى بعض الوقت. سبب إصراره على وضع علم ناديه على المطعم الموجود بوسط القاهرة، هو حبه لرؤية الشعار فى كل وقت: «بحب أشوف الشعار قدام عينى، ما هو زى ما الرزق بتاع ربنا، الحب كمان بتاع ربنا، وأنا بحب الأبيض»، يرددها رأفت حسنى، وهو يقدم ساندويتشات الفول لأحد زبائنه.

يراهن دائماً على فوز الفريق، وفى بعض المرات يأخذه الحماس، وهو ما حدث بعد لقائه عدداً من الزبائن بعد صلاة الجمعة، يناكفونه فيتعصب، يضع يده على الرخامة التى أمامه، ينفعل بعلوّ صوته: «زى ما راهنت إنه هيكسب الماتش اللى فات وكسب، براهن إنه هيكسب الماتش الجاى، ولو حصل، هوزع ساندويتشات ببلاش لكل زملكاوى». يختلف تعامل الأهلاوية معه، منهم من يغضب بسبب وضع شعار الزمالك على اللافتة ويرفض تناول أى وجبة، وآخرون يجادلونه محاولين إقناعه بعظمة وقوة النادى الأهلى، دون زعل: «كل أنواع الجماهير بقابلها، وفيه اللى ما بيتكلمش أصلاً، أما اللى بيزعل بقول له ربنا يسهل لفريقك». وقت المباراة يكون تشجيع النادى أمراً مفروضاً، مع أصحابه وعائلته المنتمية لنادى الزمالك: «بفضّى نفسى، ودايماً بحط العلم جنبى، واللى يقول لى غيّر اسم المحل علشان مصلحتى، بقول له مصلحتى مع ربنا والأبيض فى القلب».