الحجاب أشكال وألوان: مصرى وخليجى وسورى وتركى

10:21 م | الثلاثاء 05 مارس 2019

الشعب المصرى من أكثر الشعوب تأثراً بالآخرين، يميل إلى التقليد والمحاكاة، حتى لصق به مصطلح «عقدة الخواجة»، المنطق نفسه تسير عليه السيدات فى طريقة ارتدائهن للحجاب، تارةً يرتدين ما يعرف بالحجاب الخليجى، الذى انتشر فى الشارع المصرى فى بداية السبعينات مع المصريات المقبلات من دول الخليج، وتارةً أخرى يرتدين ما يعرف بالحجاب السورى والتركى، الذى انتشر فى السنوات الأخيرة، مع مجىء السوريات إلى مصر، وانتشار المسلسلات التركية، وثالثة يرتدين «التربون» الذى ظهر فى فترة السبعينات، والنتيجة ظهور أشكال كثيرة للحجاب، لا يتشابه أحدها مع الآخر.

تحاول كل سيدة توظيف طريقة حجابها مع ملابسها سواء كلاسيكية أو سواريه أو كاجوال، وتراعى أن يتناسب شكل الحجاب مع حجم وجهها لتظهر بشكل لائق ومثالى، بحسب أمنية طاهر، خبيرة لفات الطرح: «أول ظهور للحجاب كان فى الثلاثينات وكان من سماته إن الست تظهر بشكل محتشم يعنى تغطى رأسها وخلاص، ولما انتشر كان على شكل تربون، وده شفناه فى مسلسل ذات اللى قدمته نيللى كريم، وفى الستينات ظهر شكل للحجاب كانوا بيسموه حجاب الدادة أمينة وكان شبيه بالإسبانش أو التربون وعليه طرحة كبيرة لحد الصدر»، ولفتت «أمنية» إلى أن هناك سيدات لا يزلن محتفظات وملتزمات باللفات التقليدية: «زى الحجاب اللى ظهر زمان بيتلبس من الراس من غير أى دبوس، ومعمول من قماش الفيزون عشان يبقى مظبوط على الراس، وفيه كبار فى السن معندهمش أى ابتكار، مجرد دبوس فى حجاب وبيسيبوا باقى الحجاب قدامهم».

ياسمين محسن، خبيرة لفات طرح: «طول الوقت البنات بتحب تقلد لفات مختلفة عشان تعمل حاجة جديدة عشان تكسر بيها ثبات الشكل، وده اللى بيخلينا معندناش شكل واحد للحجاب، كل ما نلاقى حد مشهور أو ظهر فى التليفزيون بنقلده وخلاص»، وبحسب «ياسمين» هناك تقاليع مختلفة تكون أحياناً لافتة للانتباه وتبدو بمظهر غير لائق: «فكرة الشعر المقسوم من النص ومرفوع من ورا عشان يرفع الحجاب زى الخليج دى أبشع شكل حجاب ظهر فى مصر»، ومن أفضل صور الحجاب فى رأيها أن يكون هادئاً وطرحة واحدة فقط، حتى لا يكون مظهره مشتتاً: «الحجاب العادى المربوط ونازل على الكتفين لورا ده أفضل وأحسن وبيبان بشكل شيك جداً، وراجع على سواريه بقوة، لأن طريقة التربون على سواريه مش حلوة ومش بتليق على أى حد فبيخلى المنظر فى الآخر سيئ».

التجديد والابتكار، هما أكثر صفتين تحرص عليهما السيدات دائماً، وهو ما تقدمه شروق عبدالهادى، بلوجر محجبات، لمتابعيها طوال الوقت من خلال وسائل التواصل الاجتماعى، وغالباً ما تظهر فى قالبين من الحجاب التربون والعادى، وتقوم بالتجديد فيهما، وتنسيق أشكال الحجاب مع الملابس: «التربون مش بيتلبس مع أى حاجة، غالباً مع السهرة والكاجوال، أما الكلاسيك فأفضل حاجة له الحجاب العادى باستخدم له طرحة واحدة، ومن الأفضل تتلف على الراس مرة واحدة وتتساب لورا».