الحضانة المباشرة بعد وفاة الأم.. «فكرة مثالية لا تصلح مع الأب المستهتر»

08:55 م | الاثنين 18 فبراير 2019

فى مايو الماضى، تقدم النائب جمال الشويخى، عضو مجلس النواب، باقتراح لتعديل قانون الأحوال الشخصية، ووافق الدكتور على عبدالعال على إحالته للجنة التشريعية، ينص على نقل حضانة الطفل للأب فى حالة وفاة الأم، بدلاً من والدة الأم شريطة أن تكون وفاة الأم طبيعة ليست للأب علاقة فيها.

«وهل سيتم الرجوع لأسباب الطلاق الأصلية فى هذه الحالة؟» تتساءل كريمة صالح، السيدة الخمسينية التى استحالت حياتها جحيماً منذ الطلاق «أنا فكرت كتير فى الانتحار، لأن المسئولية تقيلة جداً، لكنى عارفة ومتأكدة إن لو جرا لى حاجة ماحدش هينفع ولادى، هل لو جرا لى حاجة قدراً القاضى هيدور عن سبب الطلاق الأصلى واللى كان التعاطى والإدمان لطليقى؟ هل أنا هربت من الحياة دى عشان لما أموت يرجع له الأولاد من تانى ويا عالم هيحصل فيهم إيه وقتها؟» السيدة التى تعمل بإحدى الجهات الخاصة عانت كثيراً بسبب مرض أحد صغيريها «أبوهم ولا يعرف عنهم أى حاجة وغيّر عنوانه عشان ماقدرش أطالبه بنفقة، عمره ما حاول حتى يشوفهم بعد الطلاق، وماطولتش منه أى حاجة، أنا المسئولة عن إيجار ومياه ونور وغاز ومدارس، ولما عمرى ينتهى يرجعوا له الولاد طيب بأمارة إيه؟!».

لم تبدُ جيهان محمد معترضة على المبدأ «مش عيب الأب يكون مسئول عن ولاده بوفاة الأم يمكن قلبه يحن، لكن دا للآباء الحقيقيين اللى يستحقوا كلمة أب، إنما اللى كان مبهدل الأم فى حياتها قضايا واستئناف على النفقة ومخلى حياتها جحيم، بل قد يكون سبب من أسباب وفاتها وحزنها يكون هو المسئول عن ولادها بعد ما تقابل رب كريم؟ اللى اتهرب من كفالة ولاده بطرق ملتوية هيكون أمين عليهم؟».

{long_qoute_1}

منى مراد، لم تر فى الفكرة منطقاً يذكر «يتم إلزام الأم بعدم الزواج للاحتفاظ بحضانة الأطفال، فهل يتم إلزام الزوج فى حالة وفاة زوجته بعدم الزواج حفاظاً على الأطفال من مهازل زوجة الأب، أم تذهب له الحضانة ليعانى الصغار من يتم الأم وسوء معاملة زوجة الأب فى نفس الوقت؟!»، تتذكر تجربتها الشخصية فتشعر بمزيد من الغبن «بنتى عمرها سنتين ونص أبوها ماشافهاش ولا سأل عنها من لحظة ولادتها، مش متصورة لو حصل لى حاجة هو اللى هيكون مسئول عنها، من أنهى ناحية؟».

بدت الفكرة كابوسية بالنسبة لسمر إيهاب التى تساءلت «طيب أنا اتطلقت بسبب كتر ضربه فيا وفى الولاد، والطلاق حصل بأعجوبة وربنا كتب لى عمر جديد، هل لو حصل لى حاجة يرجعوا له عشان يموّتهم من الضرب زى ما كان بيعمل فيا، هل دا يعقل؟».

إكرام السيد اعتبرت الفكرة مثالية للغاية لكنها لم تبد ضيقاً أو تبرماً منها بشروط «مش معترضة لو حصل لى حاجة الأب ياخد ولاده لكن لكل حالة شروط، وأتمنى زى ما بيفكروا فى حق الأب يفكروا فى وضع الأطفال، الحضانة تكون للأب الملتزم بأداء كل الحقوق والنفقات للأم وصغارها بالتراضى وبدون إهانات، لكن اللى يدخل أم أولاده أقسام شرطة ومحاكم ونيابات ويدوّخها ويجور على حق صغارها عنداً فى أمهم، وكذا سيئ السمعة والسلوك والصادر ضده أحكام، والمدمن، يجب حرمانهم من الرؤية ومن الحضانة مدى الحياة».