للمدخنين فقط: فنجان قهوة بطعم «شيشة التفاح»

08:07 م | الأحد 03 فبراير 2019

قهوة بطعم شيشة التفاح، وأخرى بطعم الموز، طعمان مختلفان ابتكرهما أحمد فوزى، صاحب محل بن، بشارع عشرة فى منطقة عبده باشا بالعباسية، محاولاً جذب جمهور معين من الزبائن المهتمين بشرب القهوة بنكهات جديدة، كالتى تصطنعها الشركات العالمية.

رغم تخرجه فى كلية الحقوق، عمل الشاب الثلاثينى مع والدته فى تجارة البن البرازيلى، واكتسب خبرة كبيرة ساعدته على الابتكار فى هذا المجال، محاولاً فى البداية صنع القهوة والنسكافيه بنكهاتهما المعروفة: «القهوة زمان كان ليها وضعها بين الناس، دلوقتى بقى كله يشرب البن سريع الذوبان علشان أسهل، مع أنها مش نفس مفعول البن العادى، بدأت أتعلم القهوة بالشيكولاتة والبندق، وأعمل كوفى مكس».

فى أحد أرجاء المحل، يجلس «فوزى»، محاولاً خلط الأطعمة ببعضها لصنع نكهة جديدة يقدمها لزبائنه كل عام، ويورّدها لبعض الكافيهات ومحال بيع القهوة، مختصاً هذا العام المدخنين: «البن مجال كبير، وأنا بدأت عامل فى محل والدى، كل مهمتى نقل البضاعة بس، لحد ما بقيت مسئول المحل، وبعدها بقيت أبتكر فى النكهات، وآخر حاجة ظبطت معايا وعجبت الناس قهوة بطعم شيشة التفاح، ودى طبعاً للمدخنين»، لافتاً إلى أن الكيلو يصل سعره إلى 140 جنيهاً، وأن الهدف منها ليس تعديل المزاج فقط، لكن المساعدة فى الإقلاع عن التدخين، مستنكراً أصحاب المحال الذين يخلطون البن مع القمح لزيادة كميته: «وجع المعدة اللى الواحد بيحس به من شرب القهوة ده سببه الغش فى البن».