حكايات الفنانين مع «الجن والعفاريت».. في «أوضة عبير صبري» ومكتب الصاوي

02:30 م | السبت 02 فبراير 2019

ربما يكون ما رووه وهما من محض تلبسهم لشخصيات تمثيلية مرتبطة بعالم الجن والعفاريت، وربما يكون حقيقة، يمكن نقلها دون حذف أو تعديل، أو التعامل معها على طريقة الأغنية الساخرة للفنان مصطفى قمر "خمس عفاريت"، "يا عفريت تبربشلي.. في جمجمتي بتهرشلي". فنانون عدة على رأسهم عبير صبري وخالد الصاوي أكدوا رؤيتهم للجن سواء في مواقف معينة تعرضوا لها من خلال مشاركتهم بالأعمال الفنية أو من خلال واقع حياتي.

ذكرت مروة صبري، شقيقة الفنانة عبير صبري، خلال استضافتها مع أختها في برنامج "الستات ما يعرفوش يكدبوا"، أن "عبير كانت عامله مسلسل اسمه ألوان الطيف، وعاملة دور واحدة بتعمل أعمال أو مشعوذة، وجت في يوم قالت لي أنا العفريت عندي في الأوضة، رجعت من التصوير نامت وصحيت قالت لي العفريت عندي في الأوضة".

وأكدت عبير كلام شقيقتها قائلة، "مش هواجس، ده حقيقي، رجعت مرة من مشهد كنت لابسة جلابية بيضا وفي دم علي، لأني كنت عاملة مشهد زار، وكانوا دبحوا ديك علي ودمه فرفر على جسمي".

وأضافت "دي كلها طاقات سلبية، في مشهد زار عدته 3 أو 4 مرات، وبمثل فيه من جوايا مش من بره، وعشت مع الشخصية دي 4 أو 5 شهور، وحبتها هي والنمط الغريب اللي عايشة فيه، ووقعت تحت تأثيرها، وهي ملبوسة بالجن".

وعندما سئلت "وحصلك إيه؟"، أجابت "بدأت أشوف الجن ده، مش توهم، شوفته في الحلم، وبدأت أصحى من النوم وأسمع حاجات ترزيع تصحيني، ودي كانت حقايق وكنت مدركة"، وفسرت أنها تخلصت من هذا "الجن" قائلة، "تقعدي تتجاهلي والبؤرة اللي إنتي مركزة عليها دي تبعدي عنها وتلعبي دور تاني".

وفي برنامج صاحبة السعادة الذي تقدمه الفنانة إسعاد يونس، روى خالد الصاوي، حكايته مع الجن والعفاريت، والذي أكد من خلال حديثة أن الجن قد ظهر له بالفعل، في كواليس تحضيره لتجسيد شخصية شريف ماهر، في فيلم الفيل الأزرق، ومن تلك الكواليس أنه شاهد جنا أو شيطانا في مكتبه.

وقال الصاوي، "الفيل الأزرق كان تجربة عكننت حياتي لفترة طويلة، لأنه كان لازم اقرأ كتير جدا في علم النفس، وأنا من هواة القراءة في علم النفس، واستعنت وقت التحضير بصديقة دارسة علم النفس، وقعدت أيام كتير جدا لوحدي في المكتب، والمكتب دا عند درجة معينة ممكن يتحول لكهف لما تبقى لوحدك قوي، وكل اللي بتفرج عليه الناس اللي اتلبست واللي طلعوا منها اللبس".

وأوضح أن المسألة صعبة لأن ممكن يصاب الإنسان في تلك الحالة بالكوابيس، وشرح خالد تفاصيل شخصية شريف ماهر، التي كان يحضر لها، "كان لازم أعمل كذا حاجة فوق بعض، الأول بتاع الجامعة، وبعدين الفترة اللي اتغير فيها، وبعدين الفترة اللي فصل تماما، وبعدين لما كان زمان، وبعدين الجني أو الشيطان اللي بيطلع له، وأنا لازم أعمل كل دول بسلاسة، فكل دا تعبني".

وتابع الفنان الخالد الصاوي أنه "لازم تكون ثابت وعندك إيمان ما، يخليك لما تقول انصرف ينقشع، بس بعدها بقى، هحكيلك قصة مش هتصدقيها"، مضيفا، "ظهر وضربته وضربني وكسرنا المكتب، وأنا ما بقولهاش لأن محدش بيصدقني"، وعندما سألته إسعاد يونس "هو إيه اللي ظهر؟"، أجاب "اللي ما يتسمى، وأكلت علقة!".

وسرد أمير كرارة خلال استضافته على قناة "mbc" ما حدث له مع الجن قائلا، "كنت بتمشى في أحد الشوارع ومكنش فيه حد ماشي نهائي ووجدت من يضربني على رأسي بشاكوش بقوة شديدة وسال الدم من رأسي وتوجهت للمستشفى الموجودة بنفس الشارع ولما أصبحت بخير ذهبت لنفس الشارع بعد فترة وإذ بي أسأل عن المستشفى لأفاجأ أنها أغلقت منذ 20 عاما".