مبادرة لإعادة تدوير الملابس: خليك «مودرن»
مبادرة لإعادة تدوير الملابس: خليك «مودرن»
«بدِّل ملابسك القديمة والبس جديد»، شعار رفعته مجموعة من الشباب بعد موجة ارتفاع أسعار الملابس الشتوى، كحلٍّ للتوفير، بشرط أن تكون الملابس القديمة فى حالة جيدة.
أحمد حسين، أحد منظِّمى الفعالية، أوضح أن الفكرة ستنطلق مع مطلع الشهر المقبل، وسيتم استبدال الملابس القديمة بأخرى جديدة من تصميم خط إنتاج ملابس خاص بهم: «حسينا إن الجمعيات الخيرية بتاخد اللبس وممكن ما يوصلش للى يستحقه.. فحبينا نعمل خير بشكل مختلف».
يشترط الفريق أن تكون حالة الملابس جيدة، والسبب فى ذلك، وفقاً لـ«حسين»: «اللبس اللى هيتبدل لازم يكون شكله لطيف ومش متهالك، لأنه هيروح لحد تانى محتاجه»، ويتم التبديل بنظام القِطع: «لو بدّلت قطعة هتاخد مقابلها واحدة جديدة من خط إنتاجنا»، على أن يقوم الفريق فيما بعد بتوصيل الملابس القديمة للمحتاجين: «عملية إعادة تدوير للملابس، وطبعاً مفيش منها أى ربح».
وفى حالة عدم تساوى تكلفة القطعة القديمة مع الجديدة يقوم الزبون بدفع قيمة مالية بسيطة: «لا تتجاوز الـ50 جنيه، وده رقم ما يتقارنش بأسعار الملابس الشتوى، وفى نفس الوقت الشخص بيكون أخد ثواب التبرع». ويتم حجز الملابس الجديدة على موقع التواصل الاجتماعى «فيس بوك» عبر صفحة الفريق «بدِّل»: «إحنا لسَّه مش لينا مكان ثابت، وشغالين الفترة دى أون لاين، بنحجز ملابس ونوصلها للزبون».
تنتشر المبادرة فى نطاق محافظتَى القاهرة والجيزة، وفقاً لـ«حسين»: «بعد شهر فبراير هنعمل يوم فى كل منطقة، ومش هنقتصر على اللبس الشتوى، دى كانت خطوة البداية، وهدفنا إننا نغيّر فى ثقافة الناس»، حيث يتم التوصيل بشكل مجانى: «مش بناخد أى خدمات شحن، لأننا حابّين نشارك فى عمل الخير، لو مش بالتبرع، يبقى بالمجهود».
