"الخشت" يداعب طلاب جامعة القاهرة: "لو حد سقط هقول الحساب مزور"

06:11 م | السبت 22 ديسمبر 2018

عقلية مختلفة تتبعها إدارة جامعة القاهرة مع الطلاب، تعتمد على التواصل مع أبنائها بلغتهم الشبابية، مبتعدة عن الرسميات والروتين، وتجلى ذلك في دعوة الدكتور محمد عثمان الخشت، رئيس جامعة القاهرة الطلاب لحضور حفلتي الفنان عمر خيرت، المقرر تنظيمهما في جامعة القاهرة "مجانا" يومي الثلاثاء والأربعاء المقبلين في تمام الساعة السابعة مساء بمناسبة مرور 110 أعوام على إنشاء الجامعة، رغم تزامن الحفل مع موسم امتحانات الفصل الدراسي الأول.

وكتب "الخشت"، عبر موقع التواصل الاجتماعي "فيس بوك" منشورا بلغة خفيفة بها بعض الكلمات الإنجليزية والكثير من "الوجوه التعبيرية" (emoji)، "عاوز أقولكم إني وقت لما كنت طالب زيكم كنت بذاكر كويس جدا وبلعب كويس جدا، ولم يكن هناك تعارض بين المذاكرة واللعب، وكان اللعب بيجدد نشاطي وبيعمل restart لذهني".

وتابع رئيس جامعة القاهرة موجها حديثه للطلاب، "كنت بلاقي أن استيعابي بقى أفضل، والضغط العصبي بقى أقل، بخاصة أن الضغط العصبي بيزيد عليك لو كنت تنافس على المركز الأول على الدفعة".

ودعا الخشت، الطلاب لحضور حفل عمر خيرت كاتبا، "إيه رأيكم تجربوا تعملوا زي ما كنت بعمل، وتعملوا Restart بحفلتين ورا بعض للموسيقار عمر خيرت؟ واللي يحضر واحدة لا يحضر الأخرى عشان يعطي فرصة لبقية زملائه، وطبعا الحفلتان مجاني"، محذرا من "سوق التذاكر السوداء"، "ولو حد باع التذاكر على القسم على طول".

وقسم الخشت، الطلبة نوعان الأول "هيقول (شايفين أهو رئيس الجامعة كان بيلعب) ودول أنا عارفهم كويس أوي، اللعيبة اللي مبيذاكروش غير آخر السنة"، وداعب الطلاب قائلا، "دول إن شاء الله سوف أحولهم مكتب".

وتابع أن "النوع الثاني هيقول (إحنا هنذاكر فقط)، لكن أنا بقولكم جربوا تذاكروا وتريحوا شوية بموسيقى عمر خيرت ونشوف النتيجة هتبقى إيه، عشان إحنا دلوقتي بنغير طريقة التفكير وماشين بمبدأ الإدارة بالنتائج وصواب أي فكرة بنتائجها على أرض الواقع".

وفي ختام المنشور كتب رئيس الجامعة، "ربنا يستر، لو حد سقط على طول هقول إن الحساب ده fake".

وأشار العديد من الطلاب لزملائهم في التعليقات على المنشور، الذي لاقى استحسان الطلاب والمعيدين والأساتذة على حد سواء، فكتب هشام زغلول، المعيد بكلية الآداب، "بصراحة مفيش دلع أكتر من كده".

وكتبت داليا شافي، الطالبة بكلية الاقتصاد والعلوم السياسية، "يسعد صباحك يا أجمل أب حنون ومعلم فاضل ودكتور أديب وفيلسوف ورئيس جامعة متميز وقائد ومطور فكر وعلم وإدارة الله يفرح قلبك يا رب".

وقال الدكتور عصام جميل، "رائع البوست وأسلوبه: أستاذي ممكن أحضر أنا من شهر 6 لم أخذ يوم إجازة وعايز أعمل restart (دمت لنا ولطلابك وأحبائك بألف خير)".

وكتب محمد رضوان من قسم الفلسفة، "أقسم بالله أجمل دكتور. في قسم فلسفة حضرتك كنت بتطلع معانا رحلات العين السخنة. بالسياره البويك الحمرا. أخ كبير. ودكتور. جميل"، أما مها إبراهيم الطالبة بكلية التجارة كتبت، "ليه عملها قبل الامتحانات على طول .. كان نفسي أحضر حفلة عمر خيرات بس للأسف لما بقول لي أمي كانت هتضربني .. يا ريت تعمل واحدة تانية بس بعد الامتحانات".