عمرو سمير عاطف عن أحمد مكي: "فنان موهوب ولا أتمنى مقابلته مرة أخرى"

11:23 ص | السبت 15 ديسمبر 2018

أثار تصريح الفنان أحمد مكي في لقائه الأخير خلال برنامج "معكم " مع الإعلامية منى الشاذلي غضب المؤلف عمرو سمير عاطف، بعدما صرح "مكي" أن الـ"سيت كوم" "تامر وشوقية" كان من إخراجه وهو من قام بتطويره ليكون بهذا الشكل.

وكتب المؤلف عمرو سمير عاطف عبر صفحته الشخصية على "فيسبوك" قائلا: "الواحد مبقاش فيه حيل يدخل في جدال والموضوع مبقاش فارق قوي وخصوصا إن تامر وشوقية كانت مرحلة عدى عليها سنين طويلة وانتهت، لكن الكلام اللي مكي قاله في اللقاء عن العمل اللي كان بدايته الحقيقية والسبب اللي خلاه يبقى ممثل مش مخرج، كلام غير دقيق لأنه بيدي إيحاء أنه كان له دور في تطوير الموضوع وكان سبب أن يبقي فيه حاجة اسمها ست كوم وأنه بيحب يذاكر الموضوع وبيقول جبنا كتب وعملنا وده كله كلام فيه مبالغة في تصوير دوره".

وتابع: "الحقيقة هى إن مكي كان سيخرج المسلسل فعلا ولم يكن يقرأ الحلقات ولا كان بيجهز نفسه لإخراج العمل كما يجب أو على الأقل مثلما أنا كنت متوقع ومنتظر منه ولغاية ما قربنا نخلص كتابة كان مشغول في أعمال ثانية ومكناش بنشوفه خالص لدرجة إنى أنا اللي اشرفت على تصميم وتنفيذ ديكور الجزء الأول من المسلسل.. ولما ابتدى التصوير مكي أخرج أول حلقتين وأنا وشريف عرفة بصفته المنتج اتفرجنا عليهم وكان المستوى مش كويس ولو كان مكي استمر في إخراج الحلقات ما اعتقدش إنها كانت هتنجح، وقام شريف عرفة بوقف التصوير بعد الحلقتين لمدة أسبوع وقرر أنه سيخرج هو الحلقات ومكي هيعمل دور هيثم وقد كان".

وأضاف: "هل هذا معناه أن مكي لم يضف للعمل؟ لا طبعا مكي كان إضافة مهمة وكبيرة جدا لتامر وشوقية وفعلا دور هيثم مكنش مكتوب كدة في الأول، لكن بعد ما مكي ابتدى يعمله بالطريقة دي ابتدينا نكتب الدور بطريقة مختلفة، لكن تامر وشوقية ما اتعملش لأن مكي كان عايز يعمل حاجة مختلفة، تامر وشوقية أنا فضلت سبع سنين ألف بيه على المنتجين والمخرجين لغاية ما شريف عرفه تحمس لإنتاج العمل وشخصية هيثم مش من إبداع مكي لوحده أنا والكتاب اللي اشتغلوا في العمل وشريف عرفة ساهمنا في خروجها بالشكل ده".

واستكمل: "ولما مكي راح يعمل فيلم إتش دبور طارق نور طلب مني إني أرفع قضية عليه بصفتي مؤلف الشخصية وشريف عرفه كلم هشام سليمان اللي كان بينفذ إنتاج الفيلم وقاله لازم تدفعوا للمؤلف وكان ممكن جدا بمنتهى البساطة إننا نوقف تصوير الفيلم لكن أنا رفضت إني اتخذ أي إجراء ورفضت إني أخد أي مقابل من هشام سليمان، وقلت لشريف عرفة أنا ومكي كنا اصحاب وهو اختار إنه ينهى الصداقة دي ويبقي نجم وفي الحقيقه ده تمن مش قليل يعني الراجل ما بعش بالرخيص".

وتابع: "ربنا يبارك له والحمد لله بقى زي ما انتوا شايفين كده.. في النهاية أنا بحب تامر وشوقية جدا وخصوصا إني تعبت فيه قوي ومكي فنان كبير وموهوب مش بس كممثل لكن برضه كمخرج ومازلت شايف إنه لو رجع يخرج مرة تانية أكيد هيبقي مخرج من أهم المخرجين في مصر ويمكن في تاريخ السينما المصرية.. لكن للأسف الواحد بيضطر يتكلم عن نفسه وعن مجهوده لما يلاقي تصرفات وكلام بيعكس نرجسية ورغبة في التكويش على كل حاجة زي ده.. بتمنى التوفيق لمكي دايمًا لكن ومتمناش إننا نتقابل تاني لا في شغل ولا حتى صدفة".