جنون الأسعار يرفع تكلفة «الأكل الأرديحى»: الشاطرة تطبخ من غير بطاطس

10:04 م | الثلاثاء 23 أكتوبر 2018

«صينية بطاطس، مسقعة، بصارة، عدس، كشرى، محشى».. قائمة الوجبات «الأرديحى» على السفرة المصرية، أكلات تلجأ إليها معظم الأسر المصرية عندما يضيق بها الحال ولا تقدر على أسعار اللحوم والفاكهة والأسماك، كانت هى طوق النجاة الوحيد باعتبارها من الأكلات الاقتصادية غير المكلفة، لكن مع الارتفاع الكبير الذى تشهده أسعار الخضراوات حالياً، خاصة البطاطس التى وصل سعرها إلى 12 جنيهاً، انضم «الأكل الأرديحى» إلى قائمة الأكلات المكلفة، التى ترهق ميزانية الأسر.

{long_qoute_1}

«صينية البطاطس اللى كنت باعملها بكيلو بطاطس ونص كيلو طماطم وماتكلفش أكتر من 7 جنيه عشان تسند الميزانية لحد آخر الشهر، بقت تكلف 30 جنيه ومن غير لحمة ولا فراخ، حاجة كده أرديحى».. بحسب إيمان مصطفى، ربة منزل، التى أشارت إلى أن سعر كيلو البطاطس 12 جنيهاً، والطماطم 12 جنيهاً، والبصل 8 جنيهات، والباذنجان 5 جنيهات، والفلفل الرومى 13 جنيهاً، والجزر 10 جنيهات، وهو ما اضطرها إلى أن تقلل من كمية الأكل التى تطهوها يومياً: «هنجيب منين والأسعار بالشكل ده؟!».

تلجأ سميرة عبدالرحمن، ربة منزل إلى حيلة أخرى للهروب من الميزانية المرتفعة للأكل الأرديحى: «أنا باشترى ربع كيلو من كل حاجة من الخضار وأعملها تورلى من غير لحمة ولا فراخ»، تذكر أنها كانت تقوم بطهى أصناف مختلفة من الخضراوات دون لحوم أو فراخ لأكثر من 6 مرات بالشهر: «كانت بتسند الميزانية جداً، دلوقتى الأرديحى بقى عبء على الميزانية أكتر، وساعات أضطر أجيب الخضار وأحوشه فى البيت لحد ما أجمع كمية كبيرة وأقسمها على أكياس وأعملها فى طبيخ من غير لحمة، دلوقتى لما أحب أعمل صينية بطاطس بقلل البطاطس وأحط معاها نوع تانى من الخضار الرخيص».

«المقاطعة» هى الحيلة التى تلجأ إليها الشيف مروة الشافعى، حتى تتجنب الأسعار الباهظة للخضار: «دى نصيحة لأى ست إنها هى اللى تقدر تدير الميزانية كويس، تيجى عند الحاجة الغالية أوى وماتشتريش منها كتير، نسيبها للبياعين مرمية فى السوق، وغصب عنهم هيقللوا سعرها شوية عشان ماتبوظش»، كما تنصح «الشافعى»، ربات البيوت بتقليل كميات الطعام حتى يقتصدن فى الميزانية: «صينية البطاطس اللى كنت باعملها بكيلو بقيت باعملها بنص كيلو وأحط معاها جزر وكوسة وكده أرديحى، ولو حابة أعملها بالفراخ والميزانية ماتسمحش باعملها بنص فرخة وأقطعها قطع صغيرة وبتبقى للعيلة، المهم إن الأكل يكون فيه بروتين».