"نجم" في آخر لقاءاته: مصر مش بتموت.. والإنسانية بتميز المصريين عن أي حد
"نجم" في آخر لقاءاته: مصر مش بتموت.. والإنسانية بتميز المصريين عن أي حد
"مصر مش بتموت".. كأنها كانت وصيته الأخيرة، قالها الشاعر الكبير أحمد فؤاد نجم، في آخر لقاءاته التليفزيونية على شاشة المحور، في برنامج مصر كل يوم.
وقال الفاجومي "مصر طول عمرها مش بتموت هي بتعيا بس، شعب عمل ثورتين في 3 سنين و2 رؤساء دلوقتي في السجن، ده مش بيحصل إلا في مصر بس، فالشعب المصري طول عمره ابن نكتة، أول ناس عملوا دولة هما المصريين، أول فلاح كان في المنوفية في مصر، إحنا الأول في كل شيء وهذا ليس غرور، ملقتش زي المصريين أبدا في كل البلاد".
وأضاف نجم "اللي موجود في مصر ومش موجود برة، الإنسانية، باريس دي بيسموها في فرنسا عاصمة العالم، ولو واحد وقع في المترو عندهم بيدوسوا عليه وهما ماشيين ومالهمش دعوة بيه، لو ده حصل في مصر تلاقي الدنيا كلها اتقلبت والناس تجري ويسابقوا بعض في مين يشيله، أو واحدة ست بتعدي الشارع تلاقي 3 بيجروا يعدوها، ده مش موجودة غير عند المصريين بس اللي هيا الإنسانية، التانيين آلات".
وعن تغير أوضاع المصريين قال نجم "الخبط اللي إحنا خدناه على دماغنا ده كله يخلي المصريين يتغيروا، بس هيرجعوا تاني لأن الجوهر موجود، والقشرة اللي برة هتقع، هيرجع الشعب المصري تاني زي الطاووس بجمال ريشه وحلاوته".
وعن محاكمة الرئيس السابق محمد مرسي، قال "أهطل والله صعبان عليا".
أما عن الفريق أول عبدالفتاح السيسي، وزير الدفاع والإنتاج الحربي، قال "امتداد لجمال عبدالناصر، وجوده في الجيش أقوى وأهم، لأنه يحمي البلاد من الخفافيش والتعابين".
