"مسؤول عن رعيته".. السيسي يغضب وينتقد المشروعات لضمان مستقبل المصريين

03:46 م | الأحد 09 سبتمبر 2018

افتتح الرئيس عبدالفتاح السيسي، صباح اليوم، عبر الفيديو كونفرانس، 5 مشروعات في مجال الطرق والكباري ومحاور النيل، بـ7.9 مليار جنيه، والمنفذة بواسطة الهيئة العامة للطرق والكباري وإدارة المهندسين العسكريين.

وأعرب السيسي خلال الافتتاح، عن غضبه وعدم رضاه لوجود نسبة من الأخطاء في المشروعات التي اُفتتحت، منتقدا تنفيذ المشروعات على الهواء مباشرة أمام جموع المصريين، معلقا على سقطات وأخطاء فنية في هذه المشروعات.

واعترض الرئيس السيسي على تصميم القوس الشمالي الغربي للطريق الدائري الإقليمي، الذي عرضه وزير النقل الدكتور هشام عرفات، وتعديات الأهالي على الأراضي الزراعية على جانبي الطريق، قائلا: "لو إحنا سيبنا الأرض الزراعية في النزول أو الصعود للطريق كمان 5 أو 6 سنوات ستكون مناطق مبنية غير مسيطر عليها.. إحنا بنعوض الناس تعويض مناسب جدا، بس التخطيط ما يبقاش كدا.. المناطق دي هتكون نمو عشوائي حول الطريق".

ووجه السيسي اللواء كامل الوزير رئيس الهيئة الهندسية للقوات المسلحة، بإنهاء هذه المشكلة، قائلا: "يا كامل.. أرجو نخلص الموضوع ونعوض الناس.. أنا عاوز كل الحاضرين معانا يبصوا على الأراضي الزراعية حول الطريق وحجم التعديات عليها".

وطلب السيسي من الحكومة دراسة الموضوع، محذرا من النتائج إن لم تحل هذه المشكلة: "إدرسوا الموضوع، بدل الموضوع ما يتم ويبقى عشوائي كدا، نعمله إحنا بشكل منظم، إحنا بتكلم علشان بلدنا، ده هيبقى نمو عشوائي عاوز صرف صحي ومياه وكهرباء، مش هينفع إن إحنا نعيش كدا".

وسأل السيسي الدكتور هشام عرفات وزير النقل، في أثناء افتتاحه محور التعمير بمحافظة الإسكندرية، عن سبب ضيق الحارة اليمنى بالكوبري، ما يؤدي إلى حدوث خطورة، قائلًا: "الحتة اليمين عاملة كدة ليه يا هشام؟".

ورد عرفات "لأن ده منزل الكوبري والطريق هنا بيتحول لعدد حارات معينة"، واعدًا الرئيس السيسي بإعادة النظر مرة أخرى إلى الكوبري وتوسيعه إذا لزم الأمر".

وانتقد السيسي اعتماد المحافظات على ضخ الدولة الأموال لها فقط وعدم تدبير موارد داخلية قائلا: "المحافظين محتاجين من حضراتكم كتير.. هتقولي أجيب فلوس منين معرفش.. وأنا بجيب فلوس منين؟.. وكل اللي بنعمله في الطرق مش جديد والدراسات كانت موجودة بس كان يتعمل إزاي ويتصرف عليه إزاي؟.. الوزير هشام بيتكلم عن مليار هنا ومليار هنا و5 مليار هنا.. لو كنا من الـ10 الأوائل على العالم وكنا بنعمل طرق جديدة كانوا يقولوا بتضيعوا الفلوس.. بس إحنا في الآخر خالص.. كنتم عاوزينا نفضل دايما في الآخر برضو؟.. إحنا عاملينها علشان ناخد مكان وسط العالم".

وفي أثناء استعراض اللواء حسن عبدالشافي مدير إدارة المهندسين العسكريين إنجازات الهيئة الهندسية في مجال الطرق والكباري، إضافة إلى المشروعات التي من المقرر افتتاحها خلال الفترات المقبلة.

وسأل الرئيس عبدالفتاح السيسي، مدير الإدارة عن الوقت المقرر للانتهاء من كل المشروعات المطروحة، وأكد عبدالشافي أنه من المقرر أن تنتهي المشروعات في 30 يونيو 2019، واستنكر الرئيس طول المدة المخطط لها، متسائلًا عن الهيئة التي تعمل بالمشروع وسبب استغراق كل تلك المدة، قائلا: "ليه كل ده؟".

وأجاب عبدالشافي بأن شركة "المقاولون العرب" تعمل على المشروع، مفسرًا طول المدة بأن الطريق من الأوتوستراد إلى النيل والمقدر بنحو 5 كيلومترات، يحوي كمية كبيرة من المرافق الهندسية، والتي تحتاج إلى نقلها في شريحة ضيقة جدا من الأرض.

وقاطع الرئيس السيسي عبد الشافي، مرة أخرى، معترضا على تصميم الطريق الدائري الذي يربط بين طريقي "القاهرة - الإسكندرية" الصحراوي والزراعي، وقال السيسي: "بروز المبنى السكني خلى اللي بيصمم الطريق طلع إزاي؟ لا يا حسن، لا يا كامل، ده خطر شديد على الناس اللي في البيوت، لو عربية نقل ماشية بسرعتها هتدخل في المبنى السكني.. فين حرم الطريق يا حسن، حرم الطريق نحترمه للآمان والسلام، مش علشان بنعمل 3 حارات، أنا عارف أنه عبء وتكلفة، بس وماله".

ووجه السيسي حديثه للواء حسن عبدالشافي واللواء كامل الوزير: "اعملوا طريق مظبوط، ما يبقاش بالشكل اللي أنا شايفه ده، وإحنا لسه بنفتتحه دلوقتي"، ورد عبدالشافي: "تمام يا فندم".

وتدخل السيسي، في أثناء استعراض عبد الشافي مشروع ربط الدائري الأوسطي بطريق القاهرة السويس، خلال عرض إنجازات الهيئة الهندسية في مجال الطرق والكباري، منوهًا بوجود أبنية على جانبي الكوبري، وهو ما استنكره "السيسي"، ورد "عبد الشافي"، موضحًا أن الأبنية كانت موجودة بالفعل قبل البدء في مشروع الكوبري، وطلب السيسي إزالة تلك المباني، مشددًا على تعويض أصحابها.

وطالب السيسي اللواء كامل الوزير بتوضيح ما توصول إليه في توسعة طريق "القاهرة - الإسماعيلية" الزراعي: "يا كامل إحنا مش كنا قولنا هندرس توسعة طريق القاهرة الإسماعيلية الزراعي؟"، ورد اللواء كامل الوزير رئيس الهيئة الهندسية للقوات المسلحة: "أيوة يا فندم.. من منطقة ترعة الإسماعيلية حتى تقاطع سريانوس ونعمل بها دراسة حتى الآن"، ورد السيسي "لأ، وصلني حتى الدائري الإقليمي على الأقل".. ورد عليه الوزير: "حاضر يا فندم".

وتساءل الرئيس السيسي عن عدد حارات الطريق: "هو طريق الإسماعيلية القاهرة الزراعي كام حارة؟".. فقال عبد الشافي: "حارتان"، وقال السيسي: "طيب على قد عقلي أنا يا كامل.. لو أقدر أخلي ده محور كمان 3 حارات و3 حارات حتى آخره.. صحراوي 1 وزراعي واحد بلبيس واحد والسخنة والسويس.. كلهم خارجين من الدائري الحالي وحتى الدائري الإقليمي".

ومازح الرئيس السيسي محافظ الإسماعيلية حمدي عثمان، بعدما استمر المحافظ فترة في التصفيق بعد افتتاح مشروع كوبري الفردان عبر الفيديو كونفرانس لمدة أطول من المعتاد، قائلا: "سيادة المحافظ هنفضل نسقف للصبح كدا"، ودخل في نوبة من الضحك، قائلا: "شكرا يا حمدي".

وخلال افتتاح محافظ القاهرة خالد عبد العال، مشروع طريق الدائري الأوسطي من بلبيس إلى طريق "القاهرة - السويس"، عبر خاصية "الفيديو كونفرانس"، طالبه الرئيس محافظ القاهرة بإصلاح أعمدة الإنارة على جانبي طريق مطار القاهرة، قائلًا: "طريق مطار القاهرة ده مدخل مصر، فلو سمحت نصلح عواميد النور دي، أنا شوفتها بنفسي".

وقاطع السيسي محافظ قنا أثناء حديثه عبر الفيديو كونفرانس، حيث قال اللواء عبدالحميد الهجان، إن كوبري قوس حل أزمة كبيرة، مضيفا: "بطمن سعادتك، إحنا ماشيين بخطة متوازنة والبنية التحتية ننجزها أولا، ونعمل في شبكات الطرق الداخلية وفقا للاعتمادات المالية المتاحة". وقاطعه السيسي: "ما دام قولت وفقا للاعتمادات المالية المتاحة يبقى عليك خير بقى".

واعترض الرئيس على طريقة تفكير أحد شباب قنا، بعد طلب "السيسي" من محافظ قنا أن يترك المجال لأحد الشباب المشاركين في افتتاح المشروع للحديث عن شبكة الطرق والكباري في المحافظة، ليتحدث شاب اسمه أحمد جلال عن مشروع الكوبري الذي يتم افتتاحه.

وقاطعه "السيسي"، قائلًا: "أوعى تفتكر إن أنا مش عارف إن طرقنا عايزة يترفع كفاءتها، أنا بسألك عشان بستدعي فكرة للسادة المحافظين إننا لازم نرفع كفاءة الطرق القديمة". ليجاوب الشاب قائلًا: "إن هناك طرقًا متهالكة بالمحافظة"، ليرد السيسي: "ده معناه إنها عدمانة العافية".

وأضاف السيسي: "إحنا سمعنا كلام كتير خلال الـ4 سنوات اللي فاتت، ولو كنا اتأثرنا بالكلام ده كنا هنتوقف في مكانا، بس كنا عارفين إنه مع الوقت الناس كانت هتبقى عارفة إنه اللي بيتعمل ده هيودينا فين، وهل هو ترف ولا حاجة حتمية بنعملها.. محتاجين داخل المحافظات نعمل مسابقة وناخد شهور فيها ونساعد بعض"، "ولما تمشي على الطريق وتلاقيه متهالك ماتقولش البلد فين.. قول أنا فين، ولو إحنا قصرنا أنتم كمان هتقصروا مع محافظتكم يعني؟ أنا بشكرك يا أحمد على (المتهالك)".

وقال الشاب أحمد في نهاية حديثه للسيسي: "تحياتنا من محافظة قنا لحضرتك"، فرد السيسي "لو عاوزين تحيوني يا أحمد.. لو عاوزين تحيوني يا أهل قنا، ارفعوا كفاءة شبكة الطرق بتاعتكم.. لو عاوزين تحيوني يا أهل الصعيد.. ارفعوا كفاءة طرق المدينة".

واختتم الرئيس حديثه بمطالبة المحافظين بالتخلص من ورد النيل والأعشاب التي تستهلك المياه: "بخصوص التعديات على الأراضي الزراعية أنا بكلم المحافظين ووزارة الري إن الترع حجم ورد النيل والأعشاب بيستهلك كميات كبيرة من المياه، والمفروض أنه يتم إزالته من خلال المحافظة.. والوزارة المعنية وزارة الري مفيش كلام.. لا يمكن كمسؤولين وأهالي نسمح إن حجم الزراعات التي تستهتلك كمية كببرة جدا من المياه.. لو حجم الزراعات التي لا نستفيد منها تستهلك المياه.. المفروض كنا نهتم ونزيل الكلام ده سنويا حتى لا نستهلك مياها في هذه الزراعات".

وأكد السيسي أن تلك الانتقادات والتعليقات الهدف منها الجودة والكفاءة و"ميبقاش في حاجة تعكر المشروعات"، بحسب وصفه.