أهلاوى يدهن منزله بـ«لوجو» نادى القرن قبل سفره إلى إيطاليا: سبته ذكرى لعائلتى

11:05 م | الأحد 22 يوليو 2018

على الرغم من سفره إلى إيطاليا من أجل العمل، فإنه أراد أن يترك لأهله وأصدقائه ذكرى تعبر عن روحه وشخصيته، فقام عبدالسلام عرفة بتلوين واجهات المنزل الخاص به بألوان علم النادى الأهلى، مع وضع صور لرموزه لتبقى ذكرى منه موجودة أمامهم طوال فترة غربته، بالإضافة لتعبيره عن حبه للكيان الذى يعشقه.

اللون الأحمر، مع شعار النادى، زاد من شهرة «عبدالسلام» داخل قريته دهمشا بمحافظة الشرقية، حيث لقبه الجميع بـ«الأهلاوى»، وأحيانا ينادونه بـ«بيبو»: «كانت الحاجة اللى بتميزنى وسطهم إنى بحب الأهلى جداً.. كنت أنا اللى بلمهم عشان نتفرج على الماتش وبفكرهم بمواعيد المباريات».

يتكون المنزل من 4 طوابق قام بتلوين واجهات البلكونات جميعها بلون وشعار النادى: «النقاش كان مستغرب جداً من طلبى وقعد وقت طويل جداً عشان يرسم اللوجو ويظبطه».

لم يتردد فى عمل ذلك بالرغم من كثرة عدد الجيران المنتمين لنادى الزمالك بالشارع الخاص به: «فيه زملكاوية، لكن معندناش تعصب أوى فى القرية بس الحركة منكرش إنها استفزت ناس كتير».

شعور الاستفزاز من الجيران سبب بعض الخوف داخل أسرة عبده: «أهلى فى أوقات أى ماتش خاص بالأهلى والزمالك بيكونوا حاطين إيدهم على قلبهم وبيخافوا حد ييجى يعمل حاجة فى البيت والذكرى الحلوة اللى سايبها ليهم تتحول».

ينوى «عبده» تكرار هذا «الديكور» فى المنزل الجديد الذى يقوم ببنائه: «هعمل كده بس على واجهة العمارة كلها كمان وفى الغرف من جوا، أنا بعشق حاجه اسمها الأهلى».