بريد الوطن| خطوط رصاص
بريد الوطن| خطوط رصاص
بارسم ملامحك من لونين
أسود حزين
وأبيض مخبى بهجته
بخطوط رصاص
صوتك ده إيه؟! جمر ورصاص
والطلقة حية ف الوريد
اللى التقى ف نبضك خلاص
وانا سامعة فيك حتى السكوت
بحر المآسى اللى ف عينيك
دوامته موت
وانا مركبى مكسور شراعه من زمن
مش باقى فيه غير دفته
بتلف تعزفلى الشجن
على لحن كلمة ماقلتهاش
بس الحنين فيها اتسمع
قلبى اللى ضل ف غربته
ألفين سنة.. شافك رجع
وازاى ينول القرب وانت ف بير غويط
قلبى اللى عمره ما كان عبيط
فك الوريد لحبال نجاة تتمدلك
وكرّ من روحى اللى لافة ع الوجع
خيوط لجرح تلملك
خُد من عيونى الضمتين
خلينى أكون لك غرزتين
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
