مضربون عن الزواج لأسباب اقتصادية: أجيب مصاريفه منين؟!

العزوف عن الزواج هو قرارهم الذى اتخذوه عن اقتناع تام، ولأسباب متعددة، أهمها تكلفته المرتفعة التى يعجز أى شاب عن الإيفاء بها، بعضهم أجَّل الخطوة لحين إشعار آخر، والبعض الآخر استبعد الفكرة من ذهنه تماماً، وأمام القرارين أصدر الجهاز المركزى للتعبئة والإحصاء دراسة كشفت عن أن معدلات الزواج انخفضت فى عام 2017 إلى 10.3 فى الألف، مقابل 11 فى الألف عام 2010.

{long_qoute_1}

أنا شايل الفكرة من دماغى بسبب ميزانية الزواج المرتفعة، أنا شاب لسه ببدأ حياتى، والبنات دلوقتى بقى ليها تطلعات كبيرة، وفيه شريحة كبيرة منهم عاوزة كل حاجة، الواحد عشان ياخد الخطوة دى لازم يكون عامل حسابها، الموضوع مش عقدة من الجواز بس هنجيب مصاريفه منين؟!.

مصطفى أمين

30 سنة

قررت تأجيل الجواز لأسباب كتير، أهمها تكاليف تجهيز الشقة، دلوقتى التكلفة مش أقل من 150 ألف جنيه، ده غير مصاريف الفرح، كل حاجة غليت والمرتب ثابت، ده غير إن الجواز ما ينفعش بشغلانة واحدة، لازم أكون شغال شغلانتين عشان أقدر أصرف على أسرة.

محمد زينهم

31 سنة

النكد والمشاكل همّا دول اللى معقدنى فى الجواز كله، وبيخلونى أهرب من الفكرة تماماً، أنا بحب أعيش بحريتى، ما بحبش وجع الدماغ، صعب فى الزمن ده تلاقى واحدة مش نكدية، أنا قررت أأجّل الفكرة دى، مع إن ليا أصحاب كتير اتجوزوا بس لما بسمع مشاكلهم بتعقّد.

محمد سعيد

30 سنة

مش عايز أتجوز حالياً بسبب الماديات، الدنيا بقت صعبة ومش مضمونة، والجواز يعتبر «ريسك» لأن الدنيا كل يوم بتغلى، وقبل اتخاذ أى خطوة لازم أحسبها كويس جداً، وأكون مستقر مادياً تماماً ونفسياً، صحابى المتجوزين بيحكوا لى إنهم بيعانوا، وكتير منهم بيقولوا لى أنا إيه اللى خلّانى أتجوز.

أحمد مجدى

32 سنة

مأجّل الجواز لهدف معين خاص بشغلى وطموحاتى، عندى أحلام عايز أحققها، أهمها إنى أعمل مشروعى الخاص فى مجال الهندسة، وأكون مطمن مادياً ومستقر قبل ما آخد الخطوة دى، خاصة فى ظل ظروف البلد الحالية، وفيه سبب تانى ترفيهى وهو إنى عايز ألفّ العالم، وبعدها أبقى أفكر فى الجواز.

أحمد الليثى

33 سنة

• الجهاز المركزى للتعبئة والإحصاء
• أحلام
• الزواج
• معدلات الزواج
• تأجيل الزواج
• الجهاز المركزى للتعبئة والإحصاء
• أحلام
• الزواج
• معدلات الزواج
• تأجيل الزواج