بريد الوطن| حاجة منى
بريد الوطن| حاجة منى
الساعة دقّت
غُربة بالظبط.. إلا ليلة
والدقايق ماشية بتعافر تقيلة
عقربين يتلاقوا سهوة ويحضنوا
اللى باقى م الأمانى المستحيلة
والشنط مرصوصة حزنك
ع الأرض مستنية إيدك
خدت إيه غير حلم نازف
دم من أوصال وريدك
تذكرة طيران وفيزا
ودمعتين ف عيونى ميزة
وضحكة باهتة من شفايفى بتنتحر
بصوت رسالة جاية فجأة من بريدك
اوعى تنسى حاجة منى
وانت بتلملم ف روحك
خد معاك من حسن ظنى
وسيبلى حفنة من جروحك
هلتقيها بخيط وإبرة
شاطرة أنا ف تخييط جراحك
وع الجراح أنا برضه صابرة
واوعى تنسى ف جيب مشاعرك
ليلة مرت بينا عابرة
خد معاك صورتى الجميلة
وسيبلى منك.. بس ليلة
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
